“Sabah” Çempionlar Liqasında tarix yazmaq üçün meydana çıxır!

“Sabah” klubu bu gün UEFA Çempionlar Liqasında növbəti və həlledici oyununu keçirəcək.

TodayPress TV xəbər verir ki, Azərbaycan çempionu qitənin ən nüfuzlu klub turnirinin üçüncü təsnifat mərhələsinin cavab matçında Danimarkanın “Orhus” komandası ilə qarşılaşacaq.

Komandalar arasında Danimarkada keçirilən ilk qarşılaşmada “Orhus” 2:1 hesabı ilə qalib gəlib. “Sabah” mərhələ adlamaq üçün cavab matçında mütləq sərfəli nəticə əldə etməlidir.

Azərbaycan çempionu Danimarka təmsilçisini mübarizədən kənarlaşdıracağı halda, UEFA Çempionlar Liqasının pley-off mərhələsində İsrailin “Hapoel” (Beer-Şeva) və Serbiyanın “Srvena Zvezda” komandaları arasındakı cütün qalibi ilə üz-üzə gələcək.

“Sabah” mübarizəni dayandıracağı təqdirdə isə yoluna UEFA Avropa Liqasının pley-off mərhələsində davam edəcək. Bu halda “bayquşlar” Portuqaliyanın “Benfika” və Şotlandiyanın “Harts” komandaları arasındakı cütün qalibi ilə qarşılaşacaq.

Qeyd edək ki, Masazırdakı “Bank Respublika Arena”da keçiriləcək “Sabah” – “Orhus” matçı saat 20:00-da başlayacaq.

Namiq HUN