Platini 9 qollu matça sərt reaksiya verdi: “Biz şou-biznes dünyasında yaşayırıq”
Fransa millisinin sabiq kapitanı və UEFA-nın keçmiş prezidenti Mişel Platini PSJ ilə “Bavariya” arasında UEFA Çempionlar Liqasının yarımfinal mərhələsində keçirilmiş və 5:4 hesabı ilə başa çatan oyuna münasibət bildirib.
TodayPress TV xəbər verir ki, bu barədə “L’Equipe” nəşri məlumat yayıb.
Platini yüksəkhesablı qarşılaşmanın “əsrin oyunu” adlandırılmasını düzgün hesab etmədiyini deyib. Onun sözlərinə görə, yaxşı müdafiə və qapıçının möhtəşəm seyvi də qol qədər dəyərlidir.
“Çempionlar Liqasının yarımfinalında PSJ ilə “Bavariya” arasında 5:4 hesabı ilə başa çatan ilk oyundan sonra insanlar bunu “əsrin oyunu” adlandırırdılar. Şəxsən mən cavab görüşündəki 1:1 hesablı heç-heçəni daha çox bəyəndim.
Qapıçılar ələk kimi idi, müdafiəçilər isə daha da zəif çıxış etdilər. Doqquz qol buraxıldı və biz buna “əsrin oyunu” deyirik? Biz həqiqətən də şou-biznes dünyasında yaşayırıq.
Yaxşı müdafiə oyunu və qapıçının əla seyvi vurulan qol qədər gözəldir. Bundan başqa, iki milyard insan futboldan danışır və öz emosiyalarını ifadə edir. Mən də həmin iki milyard insandan yalnız biriyəm və hər zaman haqlı olmaya bilərəm”, – deyə Platini bildirib.
Qeyd edək ki, PSJ ötən mövsüm Çempionlar Liqasının yarımfinal mərhələsinin ilk oyununda “Bavariya”nı 5:4 hesabı ilə məğlub edib. Cavab qarşılaşması isə 1:1 hesabı ilə başa çatıb.
Namiq HUN
