Futbol–tennis mübahisəsi böyüyür: Skoulza çağırış
Böyük Britaniyanın sabiq bir nömrəli tennisçisi Qreq Rusedski keçmiş “Mançester Yunayted” futbolçusu Pol Skoulzu tennis matçına dəvət edib.
TodayPress TV xəbər verir ki, buna səbəb Skoulzun futbolun tennisdən daha çətin idman növü olduğunu bildirməsi olub.
Rusedski bu fikirlə qətiyyən razılaşmadığını vurğulayıb.
“Futbolu tennislə müqayisə etmək olmaz. Pol Skoulzun ‘futbol tennisdən qat-qat çətindir’ dediyini eşitdim. Gəl, tennis oynayaq və görək nə qədər davam gətirə biləcəksən. Tennisdə daim istiqamət dəyişirsən və əvəzlənmə də yoxdur”, deyə Qreq bildirib.
Sabiq tennisçi əlavə edib ki, fiziki yük baxımından tennis daha tələbkardır.
Onun sözlərinə görə, buna davamlı səfərlər, turnirlərdə iştirak və şəxsi komandanın bütün xərclərinin idmançının özü tərəfindən qarşılanması da əlavə olunur.
Rusedski hesab edir ki, bütün bu amillər tennisi futbolla müqayisədə daha çətin idman növünə çevirir.
Namiq HUN
