Peşə təhsilinə qəbul planının böyük hissəsi dövlət sifarişli yerlərdən ibarətdir
2026/2027-ci tədris ili üzrə peşə təhsilinə qəbul planının böyük hissəsi dövlət sifarişli yerlərdən ibarətdir. Eyni zamanda, əmək bazarının tələblərinə uyğun ixtisaslara üstünlük verilir.
TodayPress TV xəbər verir ki, bunu Peşə Təhsili üzrə Dövlət Agentliyinin direktoru İlqar Bayramlı media nümayəndələri üçün keçirilən brifinqdə deyib.
Onun sözlərinə görə, qəbul planının 74 faizini, yəni 24 min 425 yeri dövlət sifarişli yerlər təşkil edir. Son dörd ildə dövlət sifarişli plan yerlərinin sayı 52 faiz artıb.
İlqar Bayramlı bildirib ki, qəbul siyasəti əmək bazarının tələblərinə uyğun formalaşdırılır. Bu məqsədlə qəbul planının 44 faizi, yəni 14 min 580 yeri iqtisadiyyat, xidmət və informasiya texnologiyaları istiqamətlərini əhatə edir.
Agentlik sədri əlavə edib ki, ən çox plan yeri ayrılan ixtisaslar sırasında aşpaz, bərbər-vizajist-manikürçü, dərzi, elektrik montyoru, əməliyyatçı mühasib, elektrik qaz qaynaqçısı, kompüterlərin təmiri və xidməti üzrə texnik, qrafik dizayner, avtomobillərin təmiri çilingəri və bitkiçilik mütəxəssisi yer alır.
Qiymət Mahir
