FHN silsilə maarifləndirmə tədbirləri keçirdi

Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.

Bu barədə TodayPress TV-yə FHN-dən verilən məlumata görə, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin də iştirakı ilə Bakı Regional Mərkəzi tərəfindən Nərimanov rayon 7 nömrəli Uşaq Yoluxucu Xəstəliklər Xəstəxanasında, Xəzər rayonu Valideyn himayəsindən məhrum olmuş uşaqlar üçün 2 nömrəli Ümumi orta internat məktəbində və Nəsimi rayonu 16 nömrəli Texniki-humanitar liseydə, Sumqayıt Regional Mərkəzi tərəfindən Sumqayıt şəhər 23 nömrəli tam orta məktəbində və Abşeron rayon Xırdalan şəhər 17 nömrəli körpələr evi-uşaq baxçasında, Aran Regional Mərkəzi tərəfindən Ucar rayon Bərgüşad kənd 1 nömrəli və Göyçay şəhər Z.Bünyadov adına 3 nömrəli tam orta məktəblərində, Qarabağ Regional Mərkəzi tərəfindən Beyləqan rayon Çəmənli kənd və Bərdə rayon 6 nömrəli tam orta məktəblərində, Şimal-qərb Regional Mərkəzi tərəfindən İsmayıllı rayon Sulut kənd və Basqal qəsəbə tam orta məktəblərində, Qobustan Dövlət Aqrar İnkişaf Mərkəzində, Şimal Regional Mərkəzi tərəfindən Qusar rayon Uşaq-Gənclər İdman-Şahmat məktəbində, Cənub Regional Mərkəzi tərəfindən Yardımlı rayon S.A.Şabiyev adına Şəfəqli kənd tam orta məktəbində maarifləndirmə tədbirləri keçirilib.

Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.

Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların başvermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, sularda təhlükəsizliklə bağlı məsələlər diqqətə çatdırılıb və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.

İnteraktiv formada keçirilən tədbirlər zamanı suallar ətraflı cavablandırılıb.