Paşinyanın qarşısındakı donuz çobanına Azərbaycan şapalağı — Ağdamda bunu danışırlar...

Ermənistan daxili siyasi arenasında və revanşist qüvvələrin sıralarında özünü "qəhrəman" və Paşinyan hakimiyyətinə qarşı əsas "müxalif rəhbər" kimi sırımağa çalışan Seyran Ohanyan yenidən gündəmdədir.

Ermənistanın son otuz illik hərbi-siyasi tarixinə baxanda, Ohanyan adının ətrafında həmişə süni bir mifologiyanın qurulduğunu görürük. İşğal dövrünün "qəhrəman komandanı", keçilməz istehkamların müəllifi və ordunun sarsılmaz sütunu kimi təqdim olunan bu adam, əslində, Ermənistan dövlətini içəridən gəmirən korrupsiya zəncirinin ən əsas halqalarından biri idi. Amma zaman hər şeyi öz yerinə qoyur. Cəmiyyətə sırınan "böyük sərkərdə" imicinin arxasından bu gün maraqları və xırda biznesi üçün yaşayan işbazın reallığı boylanır.

Ohanyan Ermənistandakı daxili siyasi çəkişmələrin ortasında özünə təzə rol axtarır. Paşinyan hakimiyyətinə qarşı radikal revanşist qüvvələrin, "erməni qisasçılarının" əsas lideri kimi ortalığa düşüb. Lakin onun iddiaları Ermənistanın daxili kulisində və ordunun arxivlərindəki faktların ağırlığı qarşısında hər gün bir az da əriyir. Artıq hamı başa düşür ki, bu gərginlik sadəcə vaxtı bitmiş hərbi elitanın son çırpınışlarıdır.

Ohanyanın hərbi bioqrafiyasını bəzəyən ən böyük yalan, şübhəsiz ki, milyonlarla vəsait hesabına qurulan və illərlə təbliğ edilən o "keçilməz sədd" idi. Azərbaycan ictimaiyyətinin və hərbi ekspertlərin daxildə mənimsənilən büdcə pullarına eyhamla "Seyf Ohanyan" xətti adlandırdığı bu müdafiə sistemi, 2020-ci ilin payızında cəmi bir neçə saatın içində darmadağın oldu. Xüsusilə Ağdam istiqamətində qurulmuş o lovğa beton sədlər, Azərbaycan ordusunun müasir, ağıllı və şaxələndirilmiş hücum strategiyası qarşısında kağız kimi cırılıb atıldı. Bu gün hələ də Ağdamda nələr baş verdiyindən, "dahi" mühəndislik layihəsinin necə rüsvayçı iflasla nəticələndiyindən və Azərbaycanın onlara vurduğu o ağır hərbi şapalaqdan danışırlar.

Əslində, Ohanyanın real portretini görmək üçün hərbi poliqonlara yox, onun kölgədə qalan mülki biznesinə baxmaq lazımdır. İctimaiyyətə göstərilən sərkərdə formasının altında, Ermənistanın spirtli içki bazarında xüsusi çəkisi olan, yerli camaatın "Keşiş Ohanyan" araqları kimi tanıdığı kommersiya şəbəkəsi gizlənirdi. Tək bu fakt belə Ohanyanın maraq dairəsinin hərbi doktrinalardan yox, ticarət gəlirlərindən ibarət olduğunu sübut edir. O, müdafiə naziri olanda ordunun cibindən sızan pulların hansı sahələrə yatırıldığı sualı bu gün də Ermənistandakı daxili təhqiqatların əsas mövzusudur.

Amma onun imicinə ən öldürücü zərbə gizli biznesinin — kənd təsərrüfatı fəaliyyətinin ifşası ilə gəldi. Paşinyana qarşı tribunaları zəbt edib özünü millətin xilaskarı elan edən sabiq nazirin Ermənistanda nəhəng donuz fermalarına sahib olduğu, bu işi yaxın adamları vasitəsilə idarə etdiyi sənədlərlə ortaya çıxdı. Ordunun rəhbəri imici yaratmaq istəyən adamın həyat qaynağının donuz ferması saxlamaqdan ibarət olması onun bütün çəkisini bir anda sıfırladı. Erməni müxalifətinin Paşinyanın qarşısına alternativ lider kimi çıxarmaq istədiyi fiqur "donuz çobanı" reallığından o tərəfə keçə bilmədi.

İndi də ortada nə ölkəni qoruyacaq hərbi ağıl qalıb, nə də xalqı arxasınca aparacaq bir rəhbər. Geriyə baxanda, sadəcə donuz fermalarının və uğursuz istehkamların kölgəsində sıxılıb qalmış, iflas etmiş işbazın hekayəsi yada düşür.

Qiymət Mahir