Alkoqol və çəki artımı: Mütəxəssis kökəlmənin əsas səbəbini açıqladı
Şəkər əlavə edilmiş şirin spirtli içkilər quru şərablar və şəkərsiz tünd alkoqolla müqayisədə daha çox kaloriyə malikdir. Lakin ekspertlər bildirirlər ki, ziyafətlərdən sonra çəki artımının əsas səbəbi çox vaxt alkoqolun özü deyil, həddindən artıq qida qəbuludur.
TodayPress TV xəbər verir ki, bu barədə rusiyalı terapevt və diyetoloq Yelena Ustinova Gazeta.ru-ya müsahibəsində danışıb.
Həkim qeyd edib ki, spirtli içkilərin əsas tərkib hissəsi etil spirtidir (etanol). Məsələn, 100 ml quru şərabın tərkibində təxminən 11-12 qram etanol olur, qalan hissəsi isə sudan ibarətdir. Araq və ya konyak kimi tünd içkilərdə isə etanolun miqdarı 40%-ə çatır.
Ekspert spirtli içkiləri şərti olaraq iki qrupa bölür: şirin və şəkərsiz. Likörlər, meyvəli içkilər, tündləşdirilmiş şərablar və müxtəlif kokteyllər şirin içkilər kateqoriyasına aiddir. Bu içkilərin yüksəkkalorili olması onların tərkibinə əlavə olunan şəkər və digər karbohidratlarla bağlıdır:
"Etil spirti özlüyündə enerji dəyərinə malik olsa da, onun metabolizmi fərqli xüsusiyyətlərə malikdir. Etanolun emalı zamanı yaranan enerji birbaşa piy ehtiyatı kimi toplanmır, əsasən orqanizmin istilik istehsalına sərf olunur. Məhz bu səbəbdən spirtli içki qəbulundan sonra bir çox insan isinmə hiss edir. Beləliklə, etil spirti orqanizmdə piy kütləsinin artmasının birbaşa səbəbkarı deyil".
Buna görə də, bədən quruluşuna diqqət edən şəxslərə quru şərab və ya şəkərsiz tünd içkilər (araq, tekila, konyak) seçmək tövsiyə edilir. Çünki onların tərkibində şəkər miqdarı qat-qat azdır.
Ustinova vurğulayır ki, burada ən vacib məqam alkoqolun iştahı artırmasıdır: "Bir neçə qədəhdən sonra insanda özünənəzarət hissi zəifləyir və o, planlaşdırdığından daha çox qida qəbul etməyə başlayır. Həddindən artıq yeməyin ən çox yayılmış səbəbi məhz budur. Üstəlik, spirtli içkilər adətən yağlı və ağır yeməklərlə müşayiət olunur. Nəticədə növbəti gün maye ləngiməsi səbəbindən yaranan şişkinliklə yanaşı, çəkidə də artım müşahidə edilir".
Yekun olaraq, mütəxəssis bildirib ki, insan iştahına nəzarət edə bilirsə, şirin qəlyanaltılar olmadan içilən bir-iki qədəh quru şərabın bədən quruluşuna ciddi təsir etməsi ehtimalı azdır. Lakin bol spirtli içki və yüksəkkalorili yeməklərlə müşayiət olunan uzunmüddətli ziyafətlər çəki artımına birbaşa şərait yaradır.
