ABŞ-nin İT nəhəngi Azərbaycana gəlir! - “Yüksək maaşlı iş yerləri yaradılacaq”

Pandemiyadan sonra tanınmış ABŞ şirkəti “EPAM Systems” Azərbaycana daxil olmaq üçün bir neçə dəfə cəhd göstərib. Bu məqsədlə dövlət rəsmiləri ilə görüşlər keçirilsə də, indiyədək bu cəhdlər uğurlu olmayıb. Şirkət təklif olunan şərtlər daxilində Azərbaycanda nümayəndəlik açmağı məqsədəuyğun hesab etməyib.

TodayPress TV xəbər verir ki, İnnovasiya və Rəqəmsal İnkişaf Agentliyinin (İRİA) açıqlamasına əsasən, “EPAM” yenidən Azərbaycana gəlmək niyyətindədir.

Belə ki, adətən qlobal layihələr həyata keçirən şirkət, Azərbaycanda daha çox lokal rəqəmsal layihələrə fokuslanacaq.

Məsələ ilə bağlı Azərbaycan İnternet Forumunun rəhbəri, rəqəmsal texnologiyalar üzrə ekspert Osman Gündüz bildirib ki, “EPAM”ın Azərbaycanda fəaliyyətə başlaması yüksək ixtisaslı İT iş yerlərinin yaradılması, beynəlxalq təcrübə və qabaqcıl texnologiyaların transferi, həmçinin Azərbaycan İT sektorunun qlobal bazarlara inteqrasiyası baxımından mühüm əhəmiyyət kəsb edir. 

Onun sözlərinə görə, bu addım ölkənin rəqəmsal transformasiya prosesinə və startap ekosisteminin inkişafına da əlavə stimul verə bilər.

Qeyd edək ki, Azərbaycan bazarına daxil ola bilməyən “EPAM” son illərdə Ermənistanda və Özbəkistanda nümayəndəliklərini sürətlə açıb. Hazırda bu ölkələrdə şirkətdə minlərlə developer, analitik və digər mütəxəssislər çalışır.

Türkan İsgəndərli