Böyük dönüş: Klopp Almaniya millisinin başına keçir
Almaniyalı futbol mütəxəssisi Yurgen Klopp Almaniya millisi ilə müqavilə imzalayıb.
TodayPress TV xəbər verir ki, bu barədə tanınmış insayder Fabritsio Romano sosial şəbəkədə məlumat yayıb.
O bildirib ki, tərəflər arasında imzalanan müqavilə 2030-cu ilin iyul ayına qədər nəzərdə tutulub.
Kloppun Almaniya millisinin yeni baş məşqçisi kimi rəsmi təqdimatı bu gün keçiriləcək.
“Yurgen Klopp Almaniya millisinin yeni baş məşqçisi kimi müqavilə imzalayıb. Bu gün rəsmi təsdiq və təqdimat olacaq. Heç bir şübhə yoxdur – o, 2030-cu ilin iyul ayına qədər komandaya rəhbərlik edəcək”, – deyə Romano paylaşımında yazıb.
Qeyd edək ki, Almaniya millisi 2026-cı il dünya çempionatında 1/16 final mərhələsində Paraqvayla əsas və əlavə vaxtı 1:1 başa çatan görüşdə penaltilər seriyasında 3:4 hesabı ilə məğlub olaraq turnirlə vidalaşıb.
Yurgen Klopp bu vəzifədə Yulian Nagelsmannı əvəz edəcək.
Namiq HUN
