Ukrayna ilk dəfə bu silahları alacaq - Fransa dəstək olur

Fransa Ukraynaya hərbi dəstəyini genişləndirir. 

TodayPress TV xəbər verir ki, bu barədə Ukrayna Prezidenti Volodimir Zelenski məlumat verib.

Onun sözlərinə görə, Ukrayna Fransadan SCALP qanadlı raketləri və AASM idarəolunan aviasiya bombalarının istehsalı üçün lisenziyalar alacaq. İtaliya ilə birlikdə isə Aster 30 zenit raketlərinin birgə istehsalı həyata keçiriləcək.

Zelenski bildirib ki, Fransa Ukrayna və digər tərəfdaşlarla birlikdə FREYJA adlı ballistik raket əleyhinə müdafiə proqramı çərçivəsində də əməkdaşlıq edəcək.

Bundan əlavə, Ukrayna yeni nəsil Fransa–İtaliya istehsalı olan SAMP/T NG hava hücumundan müdafiə sistemlərini ilk alan ölkə olacaq. Fransa bu il Ukraynaya iki SAMP/T kompleksi təqdim edəcək, Fransa və İtaliya isə Aster 30 raketlərinin tədarükünü oktyabr ayına qədər sürətləndirəcək.

Zelenskinin sözlərinə görə, Ukrayna Hərbi Hava Qüvvələri üçün ilk mərhələdə 16 ədəd “Rafale” qırıcısının alınması planlaşdırılır. Bu il Ukrayna pilotları və texniki heyətinin Fransada hazırlığına başlanacaq, daha sonra isə ilk dörd “Rafale” qırıcısı Ukrayna Silahlı Qüvvələrinə təhvil veriləcək.

Kübra Musayeva