Gecə döyüşləri davam edib: İranla ABŞ arasında mini müharibə başladı/VİDEO
SEPAH ABŞ hədəflərinə və Amerika ilə əlaqəli gəmiyə raket və PUA zərbələri endirdiyini açıqladı
TodayPress TV xəbər verir ki, İranın dövlətə bağlı "Press TV" kanalının yaydığı məlumata görə, İslam İnqilabı Keşikçiləri Korpusu (SEPAH) ABŞ-nin son hücumlarına cavab olaraq Yaxın Şərqdə bir sıra hədəflərə raket və pilotsuz uçuş aparatları ilə zərbələr endirib.
Bildirilir ki, İran hərbçiləri ABŞ-la əlaqəli olduğu iddia edilən “Panaya” ticarət gəmisini gəmi əleyhinə raketlə vurub, eyni zamanda ABŞ Hərbi Dəniz Qüvvələrinin Beşinci Operativ Donanmasının komanda mərkəzinə və Yaxın Şərq ölkələrindən birində yerləşən Amerika hərbi bazasına hücum həyata keçiriblər.
SEPAH bu addımın ABŞ-ın Kəşm adasına və İranla əlaqələndirilən tankerlərdən birinə qarşı hücumlarına cavab olaraq atıldığını bildirib.
İran tərəfi yaydığı bəyanatda qeyd edib:
“Daha əvvəl xəbərdarlıq etmişdik ki, hər hansı təcavüz halında cavabımız fərqli və daha sərt olacaq. Bu dəfə də məhz belə hərəkət etdik. Bu zərbələr hər kəs üçün dərs olmalıdır.”
Qeyd edək ki, məlumat hələlik İran mənbələri tərəfindən yayılıb və hücumların nəticələri ilə bağlı müstəqil təsdiq mövcud deyil.
