Müasir gənclər niyə əvvəlki nəsildən 2 dəfə cavan görünür? SİRR AÇILDI
Son günlər sosial şəbəkələrdə 18 il əvvələ aid yayılan bir video maraqlı müzakirələrə səbəb olub. İstifadəçilər həmin görüntülərdəki gənclərin indiki yaşıdlarından daha böyük göründüyünü qeyd edirlər. Maraqlıdır, niyə əvvəlki nəsillər öz yaşlarından daha yaşlı görünürdü, müasir insanlar isə daha gənc təsir bağışlayır?
Mövzu ilə bağlı TodayPress TV-yə danışan sosioloq Hüseyn İbrahimov bildirib ki, bu tendensiya təkcə Azərbaycanda deyil, dünyanın bir çox ölkələrində müşahidə olunur.
Onun sözlərinə görə, bunun formalaşmasında həm obyektiv, həm də subyektiv amillər rol oynayır. Ekspert ilk növbədə insanların həyat tərzində baş verən dəyişikliklərə diqqət çəkib.
“Fiziki əməyin və gündəlik aktivliyin azalması insanların həm daxili inkişafına, həm də zahiri görünüşünə təsir göstərir. Bundan əlavə, uşaqlıqdan başlayaraq qidalanma vərdişləri və digər sosial faktorlar da insanın xarici görünüşünün formalaşmasında mühüm rol oynayır”, – deyə o qeyd edib.
Sosioloq hesab edir ki, qloballaşmanın təsiri ilə həyat tərzi və dəb anlayışları da dəyişib. Geyim üslubu, saç düzümləri, musiqi zövqü və ümumilikdə həyat stili əvvəlki dövrlərlə müqayisədə fərqlənir.
Onun fikrincə, bu dəyişikliklər insanların daha gənc görünməsinə səbəb olan əsas amillərdəndir.
“Bu gün dünyanın müxtəlif ölkələrində yaşayan gənclərin zahiri görünüşündə oxşarlıqlar müşahidə olunur. Qlobal tendensiyalar insanların xarici görünüşünə və özünüifadə formasına ciddi təsir göstərir”, – deyə ekspert vurğulayıb.
Hüseyn İbrahimov əlavə edib ki, bütün bu faktorların təsiri nəticəsində müasir dövrdə həm gənclər, həm də orta yaşlı insanlar əvvəlki nəsillərlə müqayisədə daha cavan görünürlər.
Xanım Musayeva
