Hicablı qadınların çimərlik dilemması: Özləri hicab taxır, bəs naməhrəmləri görmələri günahdırmı?

Hicablı xanımlar üçün çimərlik geyimləri (burkini) hazırlanıb. Məqsəd qadının bədən cizgilərini mümkün qədər örtərək dənizdən və hovuzdan istifadə etməsinə şərait yaratmaqdır.

Bəs bu zaman belə bir sual yaranır: Qadın bədənini örtür, amma çimərlikdə naməhrəm kişiləri görür. Bu, İslam baxımından nə dərəcədə uyğundur?

Qurana nəzər saldıqda görünür ki, bu mövzuda həm kişilərə, həm də qadınlara eyni prinsip tətbiq edilir.

Əvvəlcə Allah mömin kişilərə buyurur:

"Mömin kişilərə de ki, gözlərini (haramdan) çevirsinlər və iffətlərini qorusunlar."

Nur surəsi, 24:30

Ardınca isə mömin qadınlara müraciət edilir:

"Mömin qadınlara de ki, gözlərini (haramdan) çevirsinlər, iffətlərini qorusunlar..."

Nur surəsi, 24:31

Həmin ayədə qadınlara zinətlərini naməhrəmlərə nümayiş etdirməmələri də tövsiyə olunur.

Digər bir ayədə isə belə buyurulur:

"...Bir şey istədiyiniz zaman onları pərdə arxasından istəyin. Bu, həm sizin qəlbləriniz, həm də onların qəlbləri üçün daha təmizdir."

Əhzab surəsi, 33:53

Bu ayə birbaşa Peyğəmbərin (s) zövcələri ilə bağlı nazil olsa da, İslam alimləri onu hicab və ədəb mövzularında da müzakirə edirlər.

Beləliklə Quranda "hicablı qadın naməhrəm kişini ümumiyyətlə görməsin" şəklində açıq bir hökm yoxdur. Əmr olunan budur ki, həm kişi, həm də qadın baxışlarını haramdan qorusun, iffətini saxlasın.

Bu baxımdan, yalnız Qurana əsasən yanaşdıqda hicablı qadının  naməhrəm kişiləri ümumiyyətlə görməsini qadağan edən açıq hökm  yoxdur.

Əsas prinsip həm kişi, həm də qadın üçün harama aparan baxışlardan çəkinmək və iffəti qorumaqdır (Nur, 24:30–31).

Jalə Rövşən