Hazırda bir qrup dələduz fəaliyyət göstərir - İnsanları belə aldadırlar
Son vaxtlar internet üzərindən avtomobil satışı adı altında vətəndaşların aldadılması halları artır.
TodayPress TV xəbər verir ki, hüquqşünas Müşfiq Abbasov xaricdən idarə olunduğu ehtimal edilən dələduzluq şəbəkəsinin saxta avtomobil elanları yerləşdirərək yüzlərlə vətəndaşı maddi ziyana saldığını bildirib.
Onun sözlərinə görə, dələduzlar əvvəlcə şəhərdə müxtəlif şəxslərə məxsus avtomobillərin şəkillərini çəkir, daha sonra həmin fotoları internetdə bazar qiymətindən xeyli ucuz məbləğə satışa çıxarırlar:
"Hazırda bir qrup dələduz fəaliyyət göstərir. Bu cinayətkar qrup insanları belə aldadır: şəhərdə ayrı-ayrı vətəndaşlara məxsus olan avtomobillərin şəklini çəkib internetə yerləşdirirlər və avtomobillərin dəyərindən olduqca ucuz qiymətə satıldığını qeyd edirlər. Ucuz qiymət alıcıların diqqətini çəkdiyindən onlar dərhal elanda göstərilən nömrə ilə əlaqə saxlayırlar. Telefonun o biri başındakı şəxs isə əvvəlcədən hazırlanmış ssenari əsasında danışaraq qarşı tərəfdə etibar yaratmağa çalışır. Avtomobil almaq istəyən şəxs elanı görür və dərhal mobil nömrəyə zəng edir. Telefonda danışan şəxs rayonda yaşadığını, yaxın adamının xəstə olduğunu, təcili pula ehtiyacı olduğu üçün avtomobili ucuz satdığını deyir. Danışığı ilə qəmgin və saf insan təəssüratı yaratmağa çalışır".
Hüquqşünas əlavə edib ki, dələduzlar alıcını tələsdirmək üçün başqa müştərilərin də avtomobillə maraqlandığını bildirirlər.
"Həmin şəxs deyir ki, az əvvəl də bir neçə nəfər zəng edib, kim tez qərar versə, avtomobili ona satacaq. Bu isə alıcıda tələskənlik yaradır. Müştəri avtomobili əldən verməmək üçün israr edir ki, satmayın, özüm alıram. Daha sonra isə alıcıdan avtomobil üçün beh adı ilə pul istənilir. Qarşı tərəf bildirir ki, hamı belə deyir, əgər fikrin ciddidirsə, beh göndər. Kart nömrəsi verir və alıcı da adətən 300 manat civarında məbləği həmin karta köçürür. Vətəndaş pulu göndərdikdən sonra göstərilən ünvana yollanır. Lakin rayona çatdıqda artıq telefon nömrəsinə zəng çatmır və aldadıldığını anlayır. Müştəri avtomobilin olduğu deyilən rayona gedir. Ora çatanda isə bayaq danışdığı nömrə artıq bağlı olur. Araşdıranda məlum olur ki, həmin rayonda belə bir avtomobil ümumiyyətlə yoxdur".
Ekspert vurğulayıb ki, bu üsulla artıq ölkədə çoxsaylı vətəndaş zərərçəkənə çevrilib.
"Bu yolla hazırda ölkəmizdə yüzlərlə adam aldadılıb. Belə cinayətlərin araşdırılması da müəyyən çətinliklərlə müşayiət olunur. Bu cinayətkar şəbəkə xaricdən idarə olunduğu və aldadılıb alınan məbləğ 500 manatdan az olduğu üçün polisin onları məsuliyyətə cəlb etməsi də çətindir".
Müşfiq Abbasov vətəndaşlara internetdə yerləşdirilən şübhəli elanlara inanarkən ehtiyatlı olmağı, avtomobili yerində görmədən və satıcının şəxsiyyətini dəqiqləşdirmədən heç bir halda beh göndərməməyi tövsiyə edib.
"İnsanlar bu məsələdə son dərəcədə diqqətli olmalıdır. Tanımadığınız şəxslərə, xüsusilə də avtomobili görmədən və sənədləri yoxlamadan beh göndərmək böyük risk yaradır".
Türkan İsgəndərli
FOTOLAR
