Tramp “Bibi”sini belə təhqir etdi: Dünyanın danışdığı qalmaqal — SİTAT-SİTAT...

Yaxın Şərq yenidən alovlanır, lakin bu dəfə ən böyük partlayış cəbhə xəttində deyil, bağlı qapılar arxasında – Vaşinqton və Qüds xəttində baş verib. 

ABŞ Prezidenti Donald Tramp ilə İsrailin Baş naziri Benyamin Netanyahu arasında keçən son telefon danışığı diplomatik etiketləri tamamilə alt-üst edən görünməmiş gərginliyə səbəb olub. ABŞ rəsmilərinin sızdırdığı məlumatlar Ağ Ev və müttəfiqi arasındakı münasibətlərin kritik həddə çatdığını göstərir.

"Sən dəli olmusan, mən olmasaydım, həbsdə idin!"

"Axios" nəşrinin etibarlı mənbələrə istinadən yaydığı xəbərə görə, Donald Tramp İsrailin "Hizbullah"la atəşkəsə razı olması üçün Netanyahuya qarşı olduqca sərt və təhqiramiz ifadələr işlədib. Söhbətin gedişatını xülasə edən ABŞ rəsmisi Trampın Netanyahuya birbaşa belə dediyini bildirir:

“Sən dəli olmusan. Mən olmasaydım, sən indi həbsxanada olardın. Səni mən xilas edirəm. Amma indi hamı səndən nifrət edir, buna görə də hamı İsrailə nifrət edir”.

Çoxlu söyüşlərin və ağır ittihamların yer aldığı bu telefon danışığında Trampın son dərəcə qəzəbli olduğu, bir məqamda Netanyahuya “Sən nə edirsən axı?!” deyə qışqırdığı vurğulanır. Tramp İsrail Baş nazirini nankorluqda ittiham edib və ona korrupsiya məhkəmələrini xatırladaraq, vaxtilə onun İsrail Prezidenti İsxak Hersoq tərəfindən əfv edilməsi üçün necə çağırışlar etdiyini eyham vurub.

Mənbələrin bildirdiyinə görə, Tramp bu söhbətdə Netanyahu üzərində tam psixoloji üstünlük qazanıb. İsrail Baş naziri isə bu təzyiq qarşısında sadəcə, “Oldu, oldu, hər şeyin həll olunacağına əmin ol” deməklə kifayətlənib.

Pərdəarxası: Vaşinqtonu qəzəbləndirən nə idi?

Əslində, ABŞ rəsmi dairələri "Hizbullah"ın İsrailə davamlı hücumlar etdiyini və Təl-Əvivin cavab vermək hüququ olduğunu qəbul edir. Lakin Trampın qəzəbinə səbəb İsrail ordusunun son günlər həddindən artıq sərt addımlar atması olub. Vaşinqton hesab edir ki, Netanyahunun bu aqressiv taktikası ABŞ-nin İranla atəşkəsin uzadılması istiqamətində apardığı həssas diplomatik səyləri riskə atır. Çünki Tehran Livan cəbhəsində sakitlik yaranmayacağı təqdirdə heç bir razılaşmaya getməyəcəyini bəyan edib.

Bu gərgin danışıqdan sonra daxili siyasətdə də sular durulmayıb. Netanyahunun ofisi mövzu ilə bağlı susmağa üstünlük versə də, İsrail müxalifəti dərhal hücuma keçib. Yaşar Partiyasının lideri və sabiq Baş Qərargah rəisi Qadi Ayzenkot Netanyahunu zəiflikdə ittiham edərək yazıb:

“İsrail tarixində heç vaxt bu qədər açıq şəkildə, əsassız bir tələb qarşısında geri çəkilən Baş nazir olmayıb. Hökumət milli maraqlara zərər vurur. Bizə ABŞ-nin İranla danışıqları barədə nağıllar danışmayın; Metula atəş altındadır, şimal boşalır”.

Eyni zamanda, ölkənin ifrat sağçı milli təhlükəsizlik naziri İtamar Ben-Qvir də Netanyahuya çağırış edərək, Trampa "yox" deməyin vaxtı çatdığını və "Hizbullah"a qarşı hücumların genişləndirilməli olduğunu bildirib.

Telefon danışığının dərhal ardından Donald Tramp özünün "Truth Social" platformasında tamamilə fərqli bir rəsm cızmağa çalışıb. O, Netanyahu ilə “çox məhsuldar” bir danışıq apardığını yazaraq, İsrailin Beyruta planlaşdırdığı böyük hərbi reydi dayandırdığını iddia edib: “O, qoşunlarını geri çevirdi. Təşəkkür edirəm, Bibi!” 

Bununla da kifayətlənməyən Tramp "Hizbullah" rəhbərliyi ilə də gizli vasitəçilərlə danışdığını və onların atəşi dayandırmağa razı olduqlarını iddia edib. Lakin həm İsrail hərbi mənbələri Beyruta doğru heç bir qoşun hərəkətinin olmadığını bildirərək Trampı təkzib edib, həm də Vaşinqton, Qüds və Beyrutdan gələn ziddiyyətli bəyanatlar ortada dəqiq bir razılaşmanın olmadığını göstərib

Nəticədə, İsrail Beyruta planlaşdırdığı zərbələri müvəqqəti təxirə salsa da, Netanyahu "Hizbullah" hücumları dayandırmasa, Livan paytaxtını yenidən vuracaqları ilə hədələyib.

Qiymət Mahir