Ermənistan seçkisinin 100 minlik müəmması: bunlar seçicilərdir, yoxsa qatillər?

2026-cı il 7 iyun tarixində keçiriləcək parlament seçkiləri ərəfəsində Ermənistanın siyasi arenasında ən çox müzakirə olunan məsələlərdən biri Rusiyada yaşayan 100 min erməninin seçkilərdə iştirakı üçün ölkəyə mütəşəkkil şəkildə gətirilməsi iddiasıdır.

Bu rəqəmin seçki nəticələrinə real təsirini anlamaq üçün ilk növbədə ümumi seçici bazasına baxmaq lazımdır. Ermənistanda qeydiyyatdan keçmiş seçicilərin sayı təxminən 2.48–2.49 milyon nəfərdir və 100 minlik kütlə bu ümumi seçici bazasının təxminən 4%-ni təşkil edir. 

Lakin seçki günü vəziyyət fərqli ola bilər, çünki Ermənistanda seçici fəallığı (turnout) tarixən aşağıdır və adətən 50% civarında olur. Əgər seçkilərdə təxminən 1.2 milyon nəfər səs verərsə, xaricdən gətiriləcəyi iddia olunan 100 min nəfərlik qrup faktiki səs verənlərin təxminən 8–9%-ni təşkil edə bilər ki, bu da seçkinin yekun nəticəsinə ciddi təsir göstərmək gücündə olan bir rəqəmdir.

Hazırkı siyasi mənzərəyə nəzər salsaq, 2026-cı ilin may ayı üzrə sorğular iqtidardakı "Vətəndaş Müqaviləsi" partiyasının 28–36% civarında səs toplayaraq lider olduğunu göstərir. Müxalifət cinahında isə Samvel Karapetyanın "Güclü Ermənistan" bloku 10–15% dəstəklə ən ciddi rəqib kimi görünür. Seçki mənzərəsində ən kritik məqamlardan biri qərarsız seçicilərin payıdır ki, bu da hazırda 30-37% civarında dəyişir. İqtidar hazırda öndə olsa da, qərarsızların əhəmiyyətli bir hissəsinin son anda iqtidara meyllənməsi onların qələbəsini təmin edə bilər.

100 minlik kütlənin seçkiyə müdaxiləsi isə bu tarazlığı dəyişmək potensialına malikdir. Əgər bu kütlənin hamısı müxalifətə, xüsusilə pro-Rusiya yönümlü qüvvələrə səs verərsə, müxalifətin payı əhəmiyyətli dərəcədə artacaq. İqtidarın dominantlığına baxmayaraq, qərarsızların yüksək faizi və 100 min nəfərlik kənardan müdaxilə ehtimalı 7 iyun seçkilərinin nəticəsini gözlənilməz edən əsas amillərdir.

Qiymət Mahir