Sənədsiz evlər problemi böyüyür – həll niyə gecikir?
"Son həftələrdə baş verən sel və subasmalar fərdi evlərdəki sənədsiz tikililər problemini yenidən gündəmə gətirib. Müxtəlif təxmini rəqəmlər 500 mindən 700 minə qədər dəyişsə də, real göstərici daha yüksək ola bilər".
Bunu TodayPress TV-yə açıqlamasında əmlak eksperti Elnur Azadov deyib.
Onun sözlərinə görə, real rəqəm daha da yüksəkdir:
"Xüsusilə kəndlərdə torpaqların kənd təsərrüfatı təyinatlı olması səbəbindən evlərin böyük əksəriyyətində sənəd yoxdur. Bu problemlər son 100 il ərzində müxtəlif dövrlərdə yaranıb və indi böyük bir yığılma əmələ gəlib. 2015-ci ildə Prezident İlham Əliyevin 324 və ya 325 nömrəli Qərarı ilə Daşınmaz Əmlakın Dövlət Reyestri Xidmətinə sənədsiz əmlakların müəyyən siyahı üzrə çıxarış vermək tapşırılıb. Son bir ildə bu siyahılar genişləndirilib və müəyyən irəliləyiş var".
Ekspert problemləri kateqoriyalara bölür. Bunlar ilkin sənədləri olan evlər, tikinti zamanı müəyyən sənədləri olan evlər, qismən sənədli evlər və ümumiyyətlə heç bir sənədi olmayan evlərdir (əksəriyyəti kənd təsərrüfatı torpaqlarında).
"Bir həftə əvvəl Azərbaycan Dövlət Su Ehtiyatları Agentliyi açıqladı ki, kanalizasiya boruları və kollektorların üzərində 1600 ev tikilib. Dövlət qurumu bunu bilir, həmin evlərə su və kanalizasiya xətti verib, abonent kodu açıb. Yəni qurumlar özləri qanunsuz tikiliyə şərait yaradıb. 2022-ci ildə Əmlak Məsələləri Dövlət Xidməti və Ədliyyə Nazirliyi birgə brifinq keçirərək vahid portal vasitəsilə bütün qanunsuz tikililərin qeydiyyata alınması konsepsiyasının hazırlandığını bildirib. Lakin 3 il keçməsinə baxmayaraq, ciddi irəliləyiş qeydə alınmayıb".
Mütəxəssis vurğulayıb ki, müəyyən kateqoriyalara amnistiya tətbiq olunmayacaq:
* Mühafizə zolaqlarına düşən evlər (kanalizasiya, su xətləri)
* Dəmir yolu xəttindən 60 metrədək məsafədə olan tikililər
* Digər qadağan olunmuş mühafizə zonalarında yerləşən evlər
Elnur Azadov qeyd edib ki, bu problemin həlli üçün vahid dövlət konsepsiyasına və konkret vaxt cədvəlinə ehtiyac var. Hazırda isə proses çox yavaş gedir.
Türkan İsgəndərli
