Umayra Tağıyeva: "Azərbaycana daxil olan suyun həcmi 30% azalıb"
Son 10 ildə Azərbaycanda daşqın hadisələri 80 dəfədən çox artıb.
TodayPress TV xəbər verir ki, bunu Bakıda keçirilən "III Milli Şəhərsalma Forumu"nda panel müzakirəsi zamanı ekologiya və təbii sərvətlər nazirinin müavini Umayra Tağıyeva deyib.
O, quraqlıq müddətlərinin 80% artdığını bildirib:
“Havanın temperaturunun 30 dərəcədən yuxarı olduğu günlərin sayı 6 dəfə artıb. Meşə yanğınları 5 dəfə artıb. Saniyədə 25 metr sürəti aşan güclü küləklər 12 dəfə çoxalıb. Yağış hadisələri 6 dəfə artıb. Bu o deməkdir ki, bizim çox güclü erkən xəbərdarlıq sisteminə ehtiyacımız var”.
U.Tağıyeva deyib ki, Azərbaycana daxil olan suyun həcmi 30% azalıb:
“Misal üçün, bu ilin aprelində Bakıda bir gündə yağan yağıntı orta hesabla 3 aylıq normanı keçdi və təəssüf ki, iki nəfərin ölümü ilə nəticələndi. Başqa bir nümunəyə görə, 18 yanvar 2019-cu ildə, saniyədə 40 metr sürətlə əsən külək Bakıda infrastrukturun zədələnməsinə səbəb oldu. Vaxtında verilmiş xəbərdarlıqdan sonra hökumət riskli günlərdə məktəblərdə dərslərin dayandırılması qərarını verdi. Bakıda bir məktəbin damı elə bir vaxtda uçmuşdu ki, həmin vaxt şagirdlər adətən bayıra çıxırdılar. Həmin vaxt mümkün insan tələfatının qarşısını almaq üçün dövlət qurumları arasında birgə səylər göstərildi”.
