Hindistan və Rusiya Yaxın Şərqi müzakirə etdi
Hindistanın xarici işlər naziri Subrahmanyam Jaishankar rusiyalı həmkarı Sergey Lavrovla telefon danışığı aparıb. Tərəflər Yaxın Şərqdəki vəziyyəti və ikitərəfli əməkdaşlıq gündəliyini müzakirə ediblər.
ToadayPress TV xəbər verir ki, bu barədə hindistanlı nazir "X" sosial şəbəkəsində paylaşdığı açıqlamada bildirib.
“Rusiya xarici işlər naziri Sergey Lavrovla yaxşı telefon danışığım oldu. Qərbi Asiyadakı münaqişə və bununla bağlı diplomatik səylər barədə fikirlərimizi bölüşdük",-nazir qeyd edib.
Qeyd edək ki, ABŞ və İsrailin İranda həyata keçirdiyi hərbi əməliyyatlardan sonra Tehran Fars körfəzindən neft ixracının əsas çıxış yolu olan Hörmüz boğazından gəmilərin keçidini məhdudlaşdırmaqla hədələyib. İranın bu dəhlizdən keçməyə çalışan tankerlərə müntəzəm hücumları ABŞ, Avropa və Asiya bazarlarına enerji idxalını çətinləşdirir.
"The Times of India" qəzetinin məlumatına görə, Hindistan hökuməti Yaxın Şərqdə artan gərginliyə baxmayaraq, emal olunmuş neft məhsullarının ixracını məhdudlaşdırmamaq qərarına gəlib.
Jalə Rövşən
