Aralıq dənizi qarışdı, Rusiyanın gizli neft tankeri ələ keçirildi

TodayPress TV xəbər verir ki, bu barədə Fransa Prezidenti Emmanuel Makron "X" sosial şəbəkəsində paylaşım edib.

Makronun sözlərinə görə, "Deliver" adlı neft tankeri dəniz hüququnun tələblərini pozaraq Siciliya sahillərindən keçərkən Fransa Hərbi Dəniz Qüvvələri tərəfindən yoxlanılıb.

Kamerun bayrağı altında üzən və Rusiyanın Primorsk limanından yola çıxan gəmi Fransa hərbi gəmilərinin müşayiəti ilə əlavə yoxlamalar üçün lövbər dayanacağına yönləndirilib.

Fransa Prezidenti bildirib ki, "Deliver" Qərbin Rusiyaya qarşı tətbiq etdiyi sanksiyalardan yayınmaq üçün istifadə olunduğu iddia edilən "kölgə donanması" ilə əlaqəlidir.

Makron vurğulayıb ki, Fransa "kölgə donanması"nın sanksiyalardan yayınmasına və Rusiyanın hərbi fəaliyyətinin maliyyələşdirilməsinə imkan verməyəcək.

Qeyd edək ki, Fransa ötən ilin sentyabrından bəri Rusiya ilə əlaqəli olduğu ehtimal edilən daha dörd gəmini yoxlayıb. Avropa İttifaqının sanksiya siyahısında isə Rusiyanın "kölgə donanması"na aid olduğu iddia edilən 600-ə yaxın gəmi yer alır.

Qiymət Mahir