Aİ-yə ağır maliyyə yükü: İldə 3 milyard avro faiz ödənəcək
Avropa İttifaqı (Aİ) 2026–2027-ci illərdə Ukraynadakı müharibəni maliyyələşdirmək üçün Avropa Komissiyası tərəfindən cəlb edilmiş 90 milyard avroluq kreditin faizləri şəklində öz büdcəsindən ildə 3 milyard avro ödəməli olacaq.
TodayPress TV xəbər verir ki, bu barədə iqtisadiyyat üzrə avrokomissar Valdis Dombrovskis Qdanskda Ukrayna üçün keçirilən investisiya konfransında çıxışı zamanı bildirib.
"Aİ bu kreditin faizləri şəklində Avropa büdcəsindən ildə 3 milyard avro ödəyəcək", - deyə o bəyan edib.
Dombrovskis əlavə edib ki, bu, Ukraynanı maliyyələşdirmək üçün Rusiyanın dondurulmuş aktivlərini müsadirə etməkdən imtina etdiklərinə görə Aİ ölkələrinin ödədikləri qiymətdir.
O xatırladıb ki, Avropa Komissiyası Rusiyanın aktivlərini müsadirə etmək ideyasından daşınmayıb və əgər Ukrayna Rusiyadan heç bir təzminat almasa, Kiyevə verilən maliyyənin əvəzi kimi həmin vəsaitləri yenidən mənimsəməyə cəhd göstərmək niyyətindədir.
Aysel Mətləb
