ABŞ 60 min miqrantın deportasiya müdafiəsini ləğv etdi
ABŞ federal apelyasiya məhkəməsi Honduras, Nikaraqua və Nepaldan olan 60.000 miqrant üçün deportasiya müdafiəsinin (TPS – Müvəqqəti Qorunan Status) ləğv edilməsinə dair əvvəlki prosesi davam etdirməyə icazə verib.
TodayPress TV xəbər verir ki, bu barədə “The New York Times” qəzeti məlumat yayıb.
Qəzet məhkəmənin qərarını Prezident Donald Tramp administrasiyasının vətənlərindəki böhranlardan qaçan miqrantlar üçün TPS proqramını məhdudlaşdırmaq səylərində qələbəsi kimi qiymətləndirib. Xatırladılıb ki, bu il may ayında ABŞ Ali Məhkəməsi Venesueladan 350.000 miqrantın eyni proqram çərçivəsində qorunan statusdan məhrum edilməsinə icazə vermişdi.
Bildirilib ki, ABŞ administrasiyası ölkəyə əvvəlki illərdə qanunsuz daxil olan milyonlarla insanı qeyd edib və immiqrasiya siyasətinin sərtləşdirilməsini dəfələrlə müdafiə edib. 2025-ci ildə ABŞ-Meksika sərhədində fövqəladə vəziyyət elan olunub və Vaşinqton ölkə tarixində ən böyük deportasiya əməliyyatını həyata keçirməyi planlaşdırır.
Türkan İsgəndərli
