Psixoloq: “Xəyanət heç vaxt qətlin səbəbi ola bilməz, insan həyatına qıymaq haqqımız yoxdur”
Tovuzda baş verən və qadının həyat yoldaşı tərəfindən qətlə yetirilməsi ilə nəticələnən hadisə cəmiyyətdə geniş müzakirələrə səbəb olub.
Hadisənin xəyanət zəminində baş verdiyi iddia olunur və bəzi insanlar bu amili qətl üçün “haqlı səbəb” kimi görür.
Psixoloq Nabat Mirzəyeva TodayPress TV - yə açıqlamasında bildirib ki, bu cür hadisələr heç bir halda sadələşdirilməməli və sıradanlaşdırılmamalıdır.
Onun sözlərinə görə, bu kimi hadisələrin baş verməsi cəmiyyətə, düşüncələrə və insan münasibətlərinə ciddi mənfi təsir göstərir.
"Belə faciələrdə təkcə bir ailə yox, bütöv bir sistem - qohumlar, övladlar, yaxınlar zərbə alır. Burada artıq bir ailə deyil, bir psixoloji sistem çökür. İstənilən halda qətl hadisəsinə haqq qazandırmaq olmaz. Heç bir vəziyyətdə cinayət, qatillik qəbuledilən deyil. Xəyanət və ailədaxili gərginliklər illərlə toplanır, amma bunun sonu ölüm olmamalıdır. Əgər ailədə anlaşılmazlıqlar varsa, insanlar boşanmaq, ayrılmaq, danışmaq kimi qanuni yolları seçməlidir. Qətl nə sevgiyə, nə də xəyanətə cavab ola bilər".
Psixoloq vurğulayıb ki, bu cür halların kökündə təkcə ailədaxili problemlər deyil, həm də yanlış tərbiyə və gender rollarına dair stereotiplər dayanır:
"Biz oğlan uşaqlarını "sən kişisən, hökm etməlisən, ağlamaq kişiyə yaraşmaz" kimi fikirlərlə böyütməməliyik. Əksinə, onlara sevgi, anlayış, dialoq, problem həll etmə bacarığı aşılamalıyıq. Hər bir insan tərk edilə, ya da tərk edə bilər. Bu, həyatın bir hissəsidir, amma heç vaxt cinayətin bəraəti ola bilməz".
Nabat Mirzəyeva qeyd edib ki, xəyanət hər bir psixoloji travma kimi aşılmağı mümkün olan bir haldır və bu prosesdə peşəkar dəstəkdən istifadə vacibdir:
"Xəyanət dünyanın sonu deyil. Bunun psixoloqları, mütəxəssisləri var. İnsan yaşadığı ağrını qarşısındakı insandan çıxmamalıdır. Biz tərk oluna, yenidən birləşə və ya yolumuza tək davam edə bilərik. Ancaq insan həyatına qıymaq bizim haqqımız deyil", - deyə mütəxəssis fikrini sonlandırıb.
Qeyd edək ki, Tovuz Rayon Polis Şöbəsinə rayonun Aşağı Öysüzlü kənd sakini, 1985-ci il təvəllüdlü Rüstəmova Ramilənin bir neçə bıçaq zərbəsi alaraq qətlə yetirilməsi barədə məlumat daxil olub.
DİN-dən bildirilib ki, dərhal polis əməkdaşları və rayon Prokurorluğunun nümayəndələri hadisə yerinə gələrək müvafiq araşdırmalar aparıb və qətlin mərhumun keçmiş həyat yoldaşı tərəfindən törədilməsi məlum olub. Tovuz rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində qətli törətməkdə şübhəli bilinən 1987-ci il təvəllüdlü Xaliq Rüstəmov maddi sübutla birlikdə saxlanılaraq prokurorluğa təqdim edilib.
Türkan İsgəndərli
FOTOLAR
