Stounhencin "prototipi" tapıldı: 500 il daha qədimdir
İngiltərənin cənubunda, Stounhencdən cəmi bir neçə kilometr aralıda onun "prototipi" hesab edilən qədim arxeoloji qurğu aşkarlanıb.
TodayPress TV xəbər verir ki, bu barədə "AP News" məlumat yayıb.
Məlumata görə, tikili bir-birindən 120 metr məsafədə yerləşən iki taxta sütundan ibarətdir. Həmin sütunlar yay gündönümü zamanı günəşin doğduğu istiqamətə yönəlib. Tədqiqatçıların fikrincə, bu abidənin inşası Stounhencdən təqribən beş əsr əvvələ təsadüf edir.
UNESCO-nun Ümumdünya İrs Siyahısında yer alan Stounhenc kompleksi Solzberi düzənliyində beş min il əvvəl mərhələli şəkildə inşa olunmağa başlayıb. Məşhur daş dairənin özü isə e.ə. 2500-cü ildə ucaldılıb.
Abidənin hansı məqsədlə tikildiyi hələ də mübahisə mövzusudur. Ən geniş yayılmış versiyaya görə, Stounhenc günəşin hərəkətinə yönəlmiş məbəd olub və yay-qış gündönümü hadisələri ilə dəqiq uyğunlaşır.
"English Heritage" təşkilatı bildirib ki, Stounhencin təyinatı ilə bağlı müxtəlif nəzəriyyələr mövcuddur. Bəzi mütəxəssislər buranı qədim kralların tacqoyma yeri, druidlərin məbədi, yaxud tutulmaları və günəş hadisələrini proqnozlaşdıran astronomik "kompüter" hesab edirlər.
