Təhdidlərə qarşı "ORTAQ YUMRUQ" - TDT toplanır
İstanbulda Türk Dövlətləri Təşkilatının (TDT) Xarici İşlər Nazirləri Şurasının qeyri-rəsmi iclası keçiriləcək.
İclasa Türkiyə və Azərbaycanla yanaşı, Qazaxıstan, Qırğızıstan və Özbəkistan da qatılacaq.
Maraqlıdır, iclasda nələr müzakirə olunacaq?
"Müasir İnkişaf" İctimai Birliyinin sədri, siyasi şərhçi Mübariz Göyüşlü mövzunu TodayPress TV-yə şərh edib.
O qeyd edib ki, Türk Dövlətləri Təşkilatının regionda və dünyada cərəyan edən gərgin hadisələr fonunda toplaşması təqdirəlayiq bir haldır:
"Çünki cərəyan edən hadisələr demək olar ki, türk dövlətlərinin sərhədlərində və ya onlara yaxın ərazilərdə baş verir və biz bu hadisələrə biganə qala bilmərik. Söhbət Amerika və İsrailin İrana hücumundan gedir".
Analitik vurğulayıb ki, bu situasiyada Türk Dövlətləri Təşkilatına üzv olan iki ölkənin – Türkiyə və Azərbaycanın ərazisinə də raket və dron atılıb, onların təhlükəsizliyi təhdid olunur:
“Ona görə də bu təşkilat olaraq üzv dövlətlər, düşünürəm ki, bu məsələni müzakirəyə çıxara bilərlər və çıxarmalıdırlar. Burada Azərbaycana və Türkiyəyə dəstək ifadə oluna bilər və olunmalıdır. Biz bu təşkilatları və birlikləri ona görə qururuq ki, çətin günlərdə və mürəkkəb situasiyalarda bir-birimizə dəstək olaq. İndi bundan daha çətin məqam təsəvvür etmək çətindir. Çünki Azərbaycan və Türkiyə əraziləri İran ərazisindən hücum və təhdidlərə məruz qalmaqdadır”.
Mübariz Göyüşlü diqqətə çatdırıb ki, Türk Dövlətləri Təşkilatı təhdidlər qarşısında həmrəylik göstərməlidir:
"Belə bir məqamda düşünürəm ki, TDT buna münasibət bildirməli və həmrəylik göstərməlidir. Hər kəs də görməlidir ki, Türk Dövlətləri Təşkilatına üzv olan ölkələr və təşkilat özü yalnız xoş günlərdə, iqtisadi və ticarət məsələlərində deyil, həm də təhlükəsizlik, sülh, ərazi bütövlüyü və suverenliyə təhdid yarandığı məqamlarda bir araya gələ bilir və birlik nümayiş etdirir".
Qeyd edək ki, Türk Dövlətləri Təşkilatının əsas məqsədi türk dövlətləri arasında hərtərəfli əməkdaşlığa yardım etmək olan beynəlxalq hökumətlərarası təşkilatdır. Təşkilat türk dövlətləri başçılarının 3 oktyabr 2009-cu il tarixində Naxçıvan şəhərində keçirilən Zirvə görüşündə imzalanmış Naxçıvan Sazişinə əsasən yaradılıb. Azərbaycan, Qazaxıstan, Qırğızıstan və Türkiyə təşkilatın təsisçi üzvləridir. Daha sonra Özbəkistan da bu təşkilata qoşulub. Türkmənistan və Macarıstan Türk Dövlətləri Təşkilatında müşahidəçi ölkə qismində təmsil olunurlar.
Jalə Rövşən
