“Əli Kərimli o vaxtdan Ramiz Mehdiyevlə birgə fəaliyyət göstərib” – Cümşüd Nuriyevdən ŞOK DETAL
“Onsuz da Əli Kərimli hələ o vaxtlardan Ramiz Mehdiyevlə birgə fəaliyyət göstərib və uzun müddət Azərbaycanda destruktiv müxalifət statusunda çıxış etməyə, özünü “ana müxalifət” kimi təqdim etməyə və müxalifət daxilində monopoliyanı ələ keçirməyə çalışıb”.
Politoloq Cümşüd Nuriyev bunu AXCP sədri Əli Kərimlinin həbs olunması ilə bağlı TodayPress TV-yə danışarkən bildirib.
O vurğulayıb ki, Əli Kərimlinin həbsi uzunmüddətli araşdırmaların nəticəsidir:
“Əvvəla qeyd edim ki, Əli Kərimli artıq təqsirləndirilən şəxs qismində tanınıb və Səbail Rayon Məhkəməsi onun barəsində iki ay yarımlıq həbs qətimkan tədbiri seçib. Bu təsadüfi deyil. Yadda saxlamaq lazımdır ki, Dövlət Təhlükəsizliyi Xidməti heç vaxt əsassız addım atmır. Yəni bu işlər uzun müddət – ən azı 6 ay və daha çox – araşdırılır.
Burada təsadüfi heç nə yoxdur. Onsuz da Əli Kərimli hələ o vaxtlardan Ramiz Mehdiyevlə birgə fəaliyyət göstərib və uzun müddət Azərbaycanda destruktiv müxalifət statusunda çıxış etməyə, özünü “ana müxalifət” kimi təqdim etməyə və müxalifət daxilində monopoliyanı ələ keçirməyə çalışıb. Əslində buna müəyyən mənada nail olub. Düzdür, Azərbaycanda konstruktiv müxalifət mövcuddur, lakin onlar destruktiv müxalifətin lideri kimi qəbul olunurlar".
O qeyd edib ki, Əli Kərimli etdiyi əməllərə görə məsuliyyət daşıyır və buna görə də cavab verməlidir.
Ekspert vurğulayıb ki, xaricdən narazılıq edənlər prosesin onlara da yönələ biləcəyini hiss edirlər:
"Ona görə də Əli Kərimlinin barəsində həbs qətimkan tədbirinin seçilməsi, eləcə də Məmməd İbrahimlə bağlı atılan addımlar tam hüquqi əsaslarla həyata keçirilib. Xaricdə olan şəxslər müxtəlif çıxışlar edirlər, çünki yaxşı bilirlər ki, növbə onlara da çata bilər. Çünki bir var millət və dövlət üçün çalışmaq, bir də var kimlərinsə sifarişi ilə hərəkət etmək".
"Ramiz Mehdiyev–Əli Kərimli tandemi Azərbaycana ciddi ziyan vurub. Dövlətə və xalqın dövlətə olan inamına böyük zərbə dəyib. Onlar müxtəlif vaxtlarda Azərbaycan dövlətinə qarşı çoxlu açıqlamalar veriblər".
C.Nuriyev əlavə edib ki, istintaqın sonlanmasını gözləmək lazımdır:
“İstintaq başa çatdıqdan sonra daha çox məqamlar üzə çıxacaq. Mən əminəm ki, bu işlə bağlı hökumət üzvləri və deputatlar arasında da müəyyən şəxslərin adı hallana bilər. Hazırda proses daha çox cəmiyyətdə sakitlik yaratmaq və Azərbaycanda həqiqi müxalifət ilə sifarişli müxalifəti ayırmaq məqsədi daşıyır. İstintaq bitdikdən sonra bir çox məsələ aydın olacaq”.
Jalə Rövşən
