"Elçibəy" Ermənistanı uçuruma aparır...
Ermənistan daxilində, xüsusilə müxalifət dairələrində Nikol Paşinyanın siyasətini Azərbaycanın keçmiş prezidenti Əbülfəz Elçibəyin dövrü ilə müqayisə edirlər. Bu düşüncə 2020-ci il Vətən müharibəsindən sonra gücləndi və indi də seçki öncəsi yenidən aktuallaşdı.
Maraqlıdır ki, bu müqayisələr əsasən erməni siyasətçilər və ekspertlər tərəfindən səsləndirilir. Onlar Paşinyanı “Ermənistanın Elçibəyi” adlandıraraq, hər iki liderin siyasətinin ölkələri üçün ağır nəticələr doğurduğunu vurğulayırlar.
Ermənistanın keçmiş baş naziri Vazgen Manukyan 2021-ci ildə verdiyi müsahibədə açıq şəkildə demişdi:
Əbülfəz Elçibəyin Azərbaycanda rəhbərliyi Birinci Qarabağ müharibəsində bizə çox kömək etdi... İndi Azərbaycan ondan istifadə edir ki, bizim də öz Elçibəyimiz var". Manukyan Paşinyanı “rəngli inqilab” nəticəsində hakimiyyətə gələn və ölkəni böhrana sürükləyən şəxs kimi təsvir edir. O, Elçibəyin milliyyətçi və anti-Rusiya mövqeyinin Azərbaycana necə zərər verdiyini, eyni şəkildə Paşinyanın da Ermənistanı zəiflətdiyini qeyd edir.
Ermənistanın keçmiş prezidenti Robert Köçəryan da Paşinyanı “erməni Elçibəyi” adlandırıb. Bu müqayisə erməni cəmiyyətində geniş müzakirə olunub. Koçaryan və onun tərəfdarları Paşinyanın siyasətini ölkəni daxili parçalanmaya, hərbi məğlubiyyətə və beynəlxalq təcridə aparan yol kimi görürlər – eynilə 1990-cı illərin əvvəllərində Elçibəy dövründə Azərbaycanın yaşadığı kimi.
Bəzi erməni nəşrlərində Paşinyan “kəpənək Elçibəy” (yapışqan, davamlı variant) adlandırılır və onun idarəçilik tərzi yeni torpaq itkilərinə səbəb ola biləcəyi xəbərdarlığı verilir. Bu ritorika xüsusilə 44 günlük müharibədən sonra və seçki kampaniyaları zamanı güclənib.
Erməni təhlilçilərə görə, hər iki lider “xalq hakimiyyəti”, demokratiya və anti-korrupsiya şüarları ilə gəlib, lakin ölkəni dərin böhrana sürükləyiblər. Elçibəy dövründə Azərbaycan daxili qarşıdurmalar, iqtisadi çöküş və ordu zəifliyi ilə üzləşmişdi. Paşinyan dövründə isə erməni müxalifəti eyni problemləri – cəmiyyətin parçalanmasını, hərbi məğlubiyyəti və idarəçilik böhranını qeyd edir.
Onlar deyirlər ki, Elçibəyin radikal milliyyətçiliyi və Rusiya ilə münasibətləri pisləşdirməsi Azərbaycana qarşı birləşmiş müqavimət yaratmışdı. Paşinyanın da bəzi addımları xüsusilə Rusiya ilə münasibətlərdəki dalğalanmalar - Avrasiya İqtisadi Birliyi və Avropa Birliyi məsələsində toqquşmalar Ermənistanın strateji tərəfdaşlarını uzaqlaşdırdığı kimi qiymətləndirilir.
Birinci Qarabağ müharibəsində Elçibəy dövrü Azərbaycan üçün ağır itkilərlə yadda qalıb. İkinci Qarabağ müharibəsində isə Paşinyanın rəhbərliyi altında Ermənistan strateji əraziləri itirdi. Erməni müxalifəti bunu liderlik zəifliyi və real vəziyyəti qiymətləndirməməklə izah edirlər.
Müqayisə erməni daxili siyasətində Paşinyana qarşı tənqid silahı kimi istifadə olunur. Onlar göstərir ki, Ermənistanın öz daxilində belə Paşinyanın siyasəti böyük narazılıq doğurur və keçmiş uğursuz təcrübələrlə əlaqələndirilir.
Elçibəydən sonrakı dövrdə Azərbaycan bu illər ərzində güclü dövlətçilik, vahid rəhbərlik və praqmatik siyasət sayəsində böyük inkişaf yolu keçib. Vətən müharibəsində qazanılan Zəfər, iqtisadi yüksəliş və beynəlxalq mövqelərin möhkəmlənməsi bunu aydın göstərir.
Ümummilli lider Heydər Əliyevin müdrik siyasətini uğurla davam etdirən Prezident İlham Əliyevin rəhbərliyi altında Azərbaycan güclü ordu qurub, iqtisadi müstəqilliyini təmin edib və 44 günlük Vətən müharibəsində tarixi ədaləti bərpa edərək Qarabağı işğaldan azad etdi.
Bu Zəfər Azərbaycan xalqının birliyi və Müzəffər Ali Baş Komandanın qətiyyətli, uzaqgörən liderliyinin təcəssümüdür. Azərbaycan öz yolunda – sülh, sabitlik və quruculuq yolunda inamla irəliləyir. Bu, indi region üçün də ən yaxşı nümunədir.
Jalə Rövşən
