Deputat: "Rusiyanın imperiya siyasəti açıq formaya keçir"

"Rusiyanın Yekaterinburq şəhərində Rusiya Federal Təhlükəsizlik Xidmətinin əməkdaşları tərəfindən azərbaycanlı ailələrə basqın, heç bir müqavimət göstərməyən insanların işgəncələrə məruz qalması və vəhşicəsinə qətlə yetirilməsi şovinizmdən qaynaqlanan və azərbaycanlılara qarşı qəsdən törədilən terror hadisəsidir".

TodayPress TV xəbər verir ki, bu fikirləri Milli Məclisin deputatı, İqtisadi və Sosial İnnovasiyalar İnstitutunun rəhbəri Əli Məsimli bildirib.

Onun sözlərinə görə, Rusiya Xarici İşlər Nazirliyinin ötən ilin dekabrında AZAL-a məxsus mülki təyyarənin vurulması ilə bağlı verilən açıqlamalara bənzər absurd açıqlaması bir daha sübut edir ki, Yekaterinburqda törədilən insanlığa sığmayan bu vəhşilik Rusiya tərəfindən Azərbaycana qarşı yeridilən şovinist və ikiüzlü siyasətin tərkib hissəsidir.

Deputat əlavə edib ki, planlaşdırlan bu cür anti-Azərbaycan tədbiləri Rusiyada azərbaycanlılara və digər türk, müsəlman xalqların nümayəndələrinə, qeyri-rus xalqlara qarşı aparılan şovinist, ayrı-seçkilik siyasəti əslində əsrlər boyu onun müxtəlif xalqlara qarşı həyata keçirilən və zəmanəmizin reallıq prizmasından baxdıqda bumeranq effekti verən imperiya siyasətinin daha sərt və açıq formaya keçmiş davamıdır. 

"Rusiyada miqrantlara, xüsusilə də azərbaycanlılara qarşı artan təzyiqlər insan haqlarının kobud şəkildə pozulması ilə yanaşı, həm də artıq sistematik xarakter alan etnik ayrı-seçkilik siyasətin qətliamlarla müşayət olunmağa başlaması, onun çox təhlükəli həddə çatdığını göstərir. Bütün bunlar  ötən ilin dekabrında təyyarə qəzasından sonra Rusiyanın nümayiş etdirdiyi saymazlıq və Azərbaycan tərəfinə göstərilən təzyiqlər  nəticəsində onsuz da korlanan Rusiya-Azərbaycan münasibərlərini daha da pisləşdirir".

Millət vəkili vurğulayıb ki, Azərbacan Xarici İşlər Nazirliyi Rusiya Federal Təhlükəsizlik Xidmətinin əməkdaşları tərəfindən Yekaterinburqda azərbaycanlılara qarşı törətdiyi bu cinayət hadisəsi ilə əlaqədar Rusiyaya öz etirazını bildirib və cinayətkarların cəzalandırılmasını tələb edib.

"Biz də törədilən bu işgəncə faktlarını, 5 nəfərin vəhşicəsinə qətlə yetirilməsini nifrət və şiddətlə pisləyirik. Azərbaycan cəmiyyətində dərin hiddət və ciddi narahatlıq doğuran bu hadisələr əslində insanlığa qarşı cinayət kimi qiymətləndirilməlidir. Əgər bu hadisə Rusiya dövlətinin sifarişi ilə həyata keçirilməyibsə, o zaman rəsmi Moskva dərhal üzr istəməli, araşdırma başlatmalı və məsul şəxslər qanun qarşısında cavab verməlidir. Belə vəhşiliklərin təkrarlanmaması üçün təxirəsalınmaz tədbirlər görülməlidir.”

Sonda Əli Məsimli vəhşicəsinə qətlə yetirilən soydaşlarımıza Allahdan rəhmət diləyib, onların ailələrinə dərin hüznlə başsağlığı verib.

Türkan İsgəndərli