Böhranın gizli tərəfi: Mənəvi ağrını rəqəmlərlə necə ifadə etməli?
“Münaqişələrin yaratdığı psixoloji və sosial yükü ölçmək mümkün deyil”.
TodayPress TV xəbər verir ki, bunu WUF13 çərçivəsində keçirilən “Yaxın Şərq böhranı və onun qlobal mənzil və şəhərsalma sahəsinə təsirləri” adlı tədbirdə Asiya Mənzil Hüquqları Koalisiyasının təmsilçisi Lajana Manandhar deyib.
O bildirib ki, Yaxın Şərqdə baş verən münaqişələr təkcə iqtisadi deyil, həm də ciddi psixoloji və sosial nəticələr yaradır
“İnsanlar yaxınlarının bombardman və hücum bölgələrində olduğunu eşidəndə ailələrin keçirdiyi stressi və qorxunu necə ölçə bilərik?” – deyə o vurğulayıb.
Lajana Manandhar qeyd edib ki, dağılan evlərin və iqtisadi itkilərin hesablanması mümkün olsa da, insanların yaşadığı mənəvi ağrı və psixoloji gərginliyi rəqəmlərlə ifadə etmək mümkün deyil.
O, yoxsul insanların daha çox əziyyət çəkməsinin qarşısının alınması üçün real ədalətə ehtiyac olduğunu bildirib.
“Onlar çox şey istəmirlər. Sadəcə təhlükəsiz ailə, kiçik bir ev və normal yaşayış şəraiti istəyirlər”, – deyə o qeyd edib.
Asiya Mənzil Hüquqları Koalisiyasının təmsilçisi vurğulayıb ki, xaricdə çalışan insanlar zəhmət çəkərək həm ailələrinə, həm də işlədikləri ölkələrin iqtisadiyyatına töhfə verirlər.
Lajana Manandhar bildirib ki, böhranlar zamanı həmin insanların kompensasiya ilə təmin olunması və yaşayış şəraitinin qorunması məsələsi daha ciddi müzakirə edilməlidir.
O əlavə edib ki, yanacaq və ərzaq qiymətlərinin artması insanları daha dərin yoxsulluğa sürükləyir.
“Gəlirlər azalır, amma ərzaq bahalaşır. İnsanlar yeməklərinin sayını azaltmağa məcbur qalırlar”, – deyə Lajana Manandhar vurğulayıb.
Qiymət Mahir
