Kremlin Bakıya və İrəvana qəzəbinin səbəbi bəlli oldu - SENSASİON AÇIQLAMA

“Hazırda eyni vaxtda həm Azərbaycana, həm də Ermənistana qarşı təzyiqləri müşahidə edirik. Bu təsadüf ola bilməz. Deməli, ortada Rusiyasız geniş anlaşma var və Rusiyanın xüsusi xidmət orqanları da bunu artıq müəyyənləşdirib”. 

Politoloq Natiq Miri bunu TodayPress TV-yə açıqlamasında deyib.

O, Zəngəzur koridoruna ABŞ şirkətinin nəzarət edəcəyi ilə bağlı xəbərlərə münasibət bildirib:

"Zəngəzur dəhlizinin xarici şirkətə həvalə edilməsi ilk olaraq Avropa Şurasının təklifi idi. Bu, Azərbaycan və Ermənistan arasında bir müddət münaqişə predmeti oldu. Bunu istəməyən qüvvələr də var idi və onların içində əsas yeri Rusiya və İran tuturdu. O vaxtdan bəri bu ideya o qədər də əhəmiyyətli və keçərli sayılmadığı üçün müzakirələr dayandırıldı. Həqiqətən də, ABŞ bu nəqliyyat kommunikasiyasına nəzarəti öz üzərinə götürmək istəsə, bunun mümkün ola biləcəyini düşünürəm. Çünki bu məsələ öncə Türkiyə və Azərbaycanla razılaşdırılmalıdır və əlbəttə ki, bu nəqliyyat-kommunikasiya xətlərinin keçdiyi Ermənistan rəhbərliyi də razılıq verməlidir".

Analitik Ermənistanın Baş naziri Nikol Paşinyanın son Türkiyə səfərinə diqqət çəkib:

"Bu səfər qəfil baş verdi və iki dövlət başçısı arasında görüş keçirildi. Görüşün nəticələri ilə bağlı isə ictimaiyyətə o qədər də dəqiq məlumatlar verilmədi. Deyilənə görə, görüşdə ikitərəfli münasibətlər, sərhədlərin açılması və Azərbaycan-Ermənistan sülh müqaviləsi kimi məsələlər müzakirə olunub. Ancaq düşünürəm ki, Paşinyanla Rəcəb Tayyib Ərdoğan arasındakı görüşdə daha bir çox mühüm məsələ, o cümlədən Zəngəzur dəhlizinin açılması məsələsi də ciddi şəkildə gündəmdə olub. Əgər təqdim olunan informasiyalar həqiqəti əks etdirirsə, bu məsələnin reallaşmasını məntiqli və mümkün hesab edirəm. ABŞ şirkətinin dəhlizə tam nəzarəti ələ alması, həm təhlükəsizlik baxımından, həm də prosedurların icrası üçün zəmanət kimi çıxış edə bilər. Əgər bu şirkət nəqliyyat-kommunikasiya sahəsində bütün mexanizmləri öz üzərinə götürərsə, bu, həm də müəyyən mənada çəkindirici təsir göstərəcək və toxunulmazlıq effekti yaradacaq. Belə olan halda nə İran, nə də Rusiya bu məsələyə birbaşa müdaxilə edə biləcək". 

N.Miri yaxın perspektivdə bu modelin Türkiyə, Azərbaycan və Ermənistan üçün sərfəli variant ola biləcəyini düşünür:

"Ağlabatan, real və keçərli variantdır. Ola bilsin ki, bu məsələ artıq razılaşdırılıb və indi onun icra mexanizmlərinin müəyyənləşdirilməsi mərhələsinə gəlinib. Bu istiqamətdə Rusiyada azərbaycanlılara qarşı həyata keçirilən total qanunsuz hücumlar da təsadüfi deyil. Nəqliyyat-kommunikasiya sisteminə dair yeni razılaşmanın Rusiyasız və birbaşa ABŞ şirkətinin iştirakı ilə baş tutması Rusiyanı ciddi narahat edən məsələdir. Bu tip təzyiqlər yalnız azərbaycanlılara deyil, Ermənistandakı hökumətə qarşı da müşahidə olunur. Artıq Ermənistanda hakimiyyəti devirmək məqsədilə düyməyə basıldığı görünür. Nikol Paşinyanın hökuməti bu cəhdlərin qarşısını almaq üçün fəallaşıb, xüsusi xidmət orqanları genişmiqyaslı ifşa prosesinə başlayıblar. Rusiyanın emissarı kimi tanınan milyarder Samvel Karapetyan həbs olunub. Kilsə ilə dövlət arasında münasibətlər o qədər gərginləşib ki, artıq katolikos II Qaregin başda olmaqla bir sıra din xadimlərinin yaxın zamanda kilsədən uzaqlaşdırılması gözlənilir. Düşünürəm ki, Nikol Paşinyan buna nail ola biləcək".

Ekspertin fikirincə, Rusiyanın eyni zamanda həm Ermənistana, həm də Azərbaycana təzyiqi təsadüfi ola bilməz:

"Hazırda eyni vaxtda həm Azərbaycana, həm də Ermənistana qarşı təzyiqləri müşahidə edirik. Bu, təsadüf ola bilməz. Deməli, ortada Rusiyasız geniş anlaşma var və Rusiyanın xüsusi xidmət orqanları da bunu artıq müəyyənləşdirib. Bu səbəbdən də təqdim olunan məlumatlar inandırıcı görünür. Hətta ABŞ şirkətinin iştirakı olmasa belə, müəyyən güzəşt xarakterli razılaşmanın Azərbaycan, Ermənistan və Türkiyə arasında mümkün olduğu qənaətindəyəm. Mövcud perspektivlər bunu göstərir və düşünürəm ki, bu anlaşma da sülh müqaviləsi kimi uzaqda deyil".

Qeyd edək ki, Vaşinqtonda yerləşən Karnegi Beynəlxalq Sülh Fondu diplomatik mənbələrə istinadən iddia edib ki, Zəngəzur koridoruna ABŞ şirkəti nəzarət edəcək. Fond yazır ki, Tramp administrasiyası Zəngəzur dəhlizinin açılması üçün ABŞ şirkətlərindən birini "dəhlizin neytral qarantı" kimi təklif edib. ABŞ logistika şirkəti dəhlizdə məlumatların tərəflərlə paylaşılması, marşrut boyunca yük tranzitinin idarə edilməsi və monitorinqinə cavabdeh olacaq.  

Qiymət Mahir