Bakının notası Moskvanı SİLKƏLƏDİ! - Zatulini KİM DANIŞDIRIBMIŞ?
6 fevral 2026-cı il tarixində Rusiyanın Azərbaycandakı fövqəladə və səlahiyyətli səfiri Mixail Yevdokimov Azərbaycan Xarici İşlər Nazirliyinə çağırılıb.
Görüşdə Rusiya Dövlət Dumasının deputatı Konstantin Zatulinin Ermənistan vətəndaşlarının məhkum olunması ilə bağlı bəyanatına görə kəskin etiraz bildirilib və Rusiya tərəfinə nota təqdim edilib.
Azərbaycan XİN-in məlumatına görə, Zatulinin ölkəmizin suverenliyi və ərazi bütövlüyü əleyhinə çıxışları, separatizmə açıq dəstəyi və məhkəmə qərarlarını təhrif etməyə yönəlmiş açıqlamaları qətiyyətlə pislənib, Rusiya tərəfi isə bu cür destruktiv fəaliyyətlərə son qoymağa çağırılıb.
Mövzu ilə bağlı TodayPress TV-yə danışan politoloq Çingiz Şahbazi bildirib ki, Konstantin Zatulin kimi Rusiya “siyasətçi”lərinin Azərbaycana qarşı bu tip bəyanatlarla çıxış etməsi əvvəlki dövrlərdə də müşahidə olunub:
.jpg)
“Zatulin birmənalı olaraq Ermənistan tərəfinə işləyən, post-münaqişə dövründə onlara kömək edən və maddi maraqlarını güdən rus siyasətçilərindən biridir. Onun bu qəbildən olan sayıqlamalarını az eşitməmişik.
Separatçı rejimin “nümayəndələrinin” ölkəmizdə həbs edilərək mühakimə olunması ilə bağlı səsləndirdiyi fikirlər də erməni dairələrinin təzyiqləri ilə əlaqəlidir. Belə ki, ermənilərin külli miqdarda pulunu yeyən Zatulinə “Nə üçün susmusan? Səsini çıxart!” deyə təzyiq göstərilir”.
Politoloqun sözlərinə görə, Zatulinin Azərbaycana qarşı çıxışlarını birbaşa Kremlin rəsmi siyasəti kimi qiymətləndirmək düzgün olmasa da, onları təsadüfi hesab etmək də olmaz:
“Bundan əlavə, Zatulinin Azərbaycana qarşı çıxışları birbaşa Kremlin siyasəti olmaya bilər, amma tamamilə təsadüfi və Kremlin nəzarətindən kənar da hesab edilməməlidir. Kremlə lazım olanda Zatulinə çox rahat şəkildə yerini göstərə bilər. Bu baxımdan, Zatulinin sayıqlamaları heç şübhəsiz ki, həm də Kremlin Azərbaycanla bağlı vəziyyəti ölçmə siyasəti ilə üst-üstə düşür. Yəni Zatulinin bəyanatı Kremlin sifarişi olmasa da, ona qarşı müxalif də deyil”.
Ç.Şahbazi vurğulayıb ki, Zatulin Rusiya Dövlət Dumasının deputatı olsa da, rəsmi icra strukturlarını təmsil etmir:
“Bilirsiniz ki, Zatulin Rusiya Dövlət Dumasının deputatıdır. Lakin o, hökumətin hansısa qanadını və yaxud Xarici İşlər Nazirliyini təmsil etmir. Zatulin uzun illərdir ermənipərəst mövqeyi və postsovet məkanında neo-imperiyalist baxışları ilə tanınır. Onun ermənilərlə bağlı mövqeyi də yeni deyil və bütün siyasi kapitalını bu istiqamətdə xərcləməklə məşğuldur. Bu baxımdan onun mövqeyini birbaşa Kremlin mövqeyi kimi təqdim etmək doğru olmazdı”.
Ekspert qeyd edib ki, Rusiya siyasi sistemində bu cür sərbəst çıxış edən deputatlar xüsusi rol oynayır:
“Diqqət etsəniz, Rusiya siyasi sistemində Zatulin kimi sərbəst danışan deputatlar çoxdur və Moskva bu cür təşəbbüs və fikirlərin sahiblərini qoruyur, bunu söz azadlığı kimi qələmə verir. Əlbəttə ki, lazım olduqda onları kənara çəkməyi də bacarır. Bu isə Moskvanın siyasətinə uyğun olmadığı zaman baş verir”.
Sonda Çingiz Şahbazi Azərbaycanın rəsmi addımının prosesin əsas göstəricisi olduğunu bildirib:
“Hazırda Azərbaycan Xarici İşlər Nazirliyi Zatulinin bəyanatı ilə bağlı Rusiyaya nota verib. Əsas indikator da məhz budur: Rusiyanın XİN-nin və ya Kremlin rəsmi mövqeyi necə olacaq? Əgər susqunluq nümayiş etdirilərsə, bu, Bakıya qarşı yumşaq təzyiq mexanizmi kimi oxunmalıdır”.
Qiymət Mahir
