Azərbaycanın təhlükəsizliyi GÜNDƏMDƏ: Prezident Münhendə hansı mesajları verdi?
"Münhen Təhlükəsizlik Konfransı çərçivəsində verilən mesajlar Azərbaycanın həm regional sülh, həm də qlobal strateji əməkdaşlıq sahəsindəki prioritetlərinin həll olunduğunu və yeni mərhələyə keçid etdiyini göstərir".
Bunu Milli Məclisin deputatı Hikmət Babaoğlu TodayPress TV-yə açıqlamasında deyib.
O bildirib ki, Münhen Təhlükəsizlik Konfransı dünyada təhlükəsizlik sahəsində müxtəlif mövzuların müzakirə olunduğu mühüm platformadır. Bu platformada hərbi, siyasi, enerji, kiber təhlükəsizlik kimi müxtəlif istiqamətlər üzrə müzakirələr aparılır və təhlükəsizliyin təmin olunması üçün əməkdaşlığın möhkəmləndirilməsi məqsədilə məsləhətləşmələr həyata keçirilir. Azərbaycan ənənəvi olaraq Münhen Təhlükəsizlik Konfransında iştirak edir.
Parlamentari vurğulayıb ki, əslində, Azərbaycan Prezidenti Münhendə yerli mətbuata verdiyi müsahibədə Azərbaycanın təhlükəsizlik prioritetlərini dilə gətirib və bir çox mühüm mesajlar verib:
"Burada həm Ermənistan ilə Azərbaycan arasında sülh məsələsinə toxunuldu, həm də de-fakto sülhün artıq əldə olunduğu bildirildi. Ancaq bunun hüquqi-siyasi baxımdan son mərhələyə çatması üçün Ermənistan konstitusiyasının dəyişdirilməsinə ehtiyac olduğu qeyd edildi. Prezident bildirdi ki, bu baş verərsə, sülhü elə səhəri gün imzalamaq mümkün olacaq. Biz həmişə Ermənistan və Azərbaycan arasında sülh sənədinin, paraflanmış sülh sənədinin imzalanması zamanı iki şərtin baş tutmasını istəyirdik: biri Ermənistan konstitusiyasının dəyişdirilməsi, digəri isə Azərbaycandan Azərbaycana - Naxçıvana maneəsiz keçid idi. Münhen Təhlükəsizlik Konfransında yerli mediaya müsahibəsində Azərbaycan Prezidenti artıq maneəsiz keçid məsələsini dilə gətirmədi, bu isə o deməkdir ki, artıq bu məsələ həll olunub".
Millət vəkili qeyd edib ki, Prezident dəhlizi "Tramp marşrutu" kimi səciyyələndirərkən onu sadəcə dəmir yolu və avtomobil yolu kimi təsvir etməyib:
“O, burada fiber-optik kabellər və digər qaz, enerji və kommunikasiyalar dəhlizlərinin olduğunu da vurğuladı ki, bu da mühüm məsələ idi. Bundan başqa, Azərbaycan Prezidenti "France 24" telekanalına müsahibəsində bu məsələlərə bir daha toxundu və lazım olan mesajları verdi. Xüsusilə Fransa ilə münasibətlərə gəldikdə, o qeyd etdi ki, tərəflər razılaşıblar ki, Fransa-Azərbaycan münasibətlərində yeni mərhələ başlasın".
H.Baboğlu əlavə edib ki, prezident bir sıra Amerika şirkətlərinin rəhbərləri ilə də görüşüb:
"Bu görüşlərdə xartiyada nəzərdə tutulan məsələlərlə bağlı kibertəhlükəsizlik və süni intellekt sahəsində əməkdaşlıq mövzuları müzakirə edildi".
Parlamentari diqqətə çatdırıb ki, Azərbaycan Prezidenti yeni dünya nizamının vacibliyini və səfərin təhlükəsizlik əhəmiyyətini vurğulayıb:
"Ən maraqlısı isə prezidentin yeni dünya nizamı və onun hansı mərhələdə olması ilə bağlı fikirlərini səsləndirməsidir. Burada o, daha çox institusional yanaşmanı önə çəkdi. Yəni, yeni dünya nizamı bir gündə baş verəcək hadisə deyil, ilk növbədə onun institusional əsaslarının formalaşması vacibdir. Bu, fərqli və yeni baxışdır. Çünki nəzəri baxımdan nə qədər fikir səsləndirilsə də, bu nizamı təsis edəcək və qoruyacaq institutlar mövcud olmasa, ondan danışmaq mümkün deyil. Ona görə də bu səfər Azərbaycanın təhlükəsizliyinin təmin olunması baxımından mühüm əhəmiyyət kəsb edir".
Qeyd edək ki, Prezident İlham Əliyev fevralın 13-də Münhen Təhlükəsizlik Konfransında iştirak etmək üçün Almaniyaya rəsmi səfərə gedib.
Jalə Rövşən
