ABŞ-Azərbaycan iqtisadi əməkdaşlığı yeni mərhələyə qədəm qoyur

"Azərbaycan Prezidenti İlham Əliyevin BMT sammiti çərçivəsində ABŞ-yə səfəri və burada keçirilən iqtisadi görüşlər iki ölkə arasında əməkdaşlığın yeni mərhələyə qədəm qoyduğunu göstərir".

İqtisadçı ekspert Famil Niftiyev bunu TodayPress TV-yə açıqlamasında bildirib.

Onun sözlərinə görə, ABŞ və Azərbaycan arasında münasibətlər ənənəvi olaraq enerji sahəsində formalaşıb. Xəzər dənizi yataqlarının işlənməsi, Bakı-Tbilisi-Ceyhan və digər enerji kəmərləri bu əməkdaşlığın əsas sütunları olub.

“Qarabağ və Şərqi Zəngəzurda yaradılan "yaşıl enerji zonaları" ABŞ investorları üçün böyük maraq kəsb edir”

Ekspert əlavə edib ki, hazırda qeyri-neft sektoru, xüsusilə bərpa olunan enerji, informasiya texnologiyaları, kənd təsərrüfatı və logistika sahələri əməkdaşlığın əsas istiqamətləri sırasındadır:

"Azərbaycanın yaşıl enerji strategiyası, Qarabağ və Şərqi Zəngəzurda yaradılan "yaşıl enerji zonaları" ABŞ investorları üçün böyük maraq kəsb edir. Burada Amerika şirkətlərinin iştirakı həm texnologiya transferi, həm də maliyyə resurslarının cəlbi baxımından əhəmiyyətli olacaq".

Mütəxəssis, həmçinin qeyd edib ki, maliyyə və investisiya əməkdaşlığı da xüsusi önəm daşıyır. Azərbaycanın kapital bazarlarının inkişafı, infrastruktur layihələrinin maliyyələşdirilməsi və xarici investisiyalar üçün təhlükəsiz mühitin təmin olunması ABŞ-nin iri fond menecerləri və investisiya şirkətlərinin marağını artırır.

“Kənd təsərrüfatında yeni texnologiyaların tətbiqi diqqətçəkən istiqamətlər olacaq”

O vurğulayıb ki, Orta Dəhliz və Zəngəzur dəhlizi kimi təşəbbüslər Amerika tərəfinə Cənubi Qafqaz vasitəsilə Avropa-Asiya ticarətində yeni strateji imkanlar təqdim edir.

Gələcəkdə isə əməkdaşlığın yüksək texnologiyalar, kibertəhlükəsizlik, təhsil və innovasiya sahələrinə qədər genişlənəcəyi gözlənilir. ABŞ şirkətləri üçün Azərbaycanın inkişaf edən İKT sektoru, startap ekosistemi və kənd təsərrüfatında yeni texnologiyaların tətbiqi diqqətçəkən istiqamətlər olacaq.

"Ümumilikdə, ABŞ-Azərbaycan iqtisadi münasibətləri əvvəlki kimi yalnız enerji layihələrinə əsaslanmayacaq. Daha çox şaxələndirilmiş əməkdaşlıq, investisiya və texnologiya transferinə yönələcək ki, bu da həm Azərbaycanın iqtisadi dayanıqlığını gücləndirəcək, həm də ABŞ üçün strateji tərəfdaşlıq imkanlarını genişləndirəcək",- deyə Famil Niftiyev fikrini sonlandırıb.

Qeyd edək ki, Prezident İlham Əliyev və birinci xanım Mehriban Əliyeva sentyabrın 23-də BMT-nin Nyu-Yorkda yerləşən mənzil-qərargahında Baş Assambleyanın 80-ci sessiyası çərçivəsində keçirilən yüksəksəviyyəli müzakirələrdə iştirak ediblər.

Səfər çərçivəsində dövlət başçısı "Ares Management" qlobal investisiya şirkətinin həmtəsisçisi və baş icraçı direktoru Maykl Aruqeti ilə görüşüb. Söhbət zamanı Azərbaycanın maliyyə bazarının dayanıqlı inkişafı və ölkəyə xarici investisiya axınının təşviqi baxımından "Ares Management" şirkəti ilə əməkdaşlığın əhəmiyyətinə toxunulub.

Türkan İsgəndərli