Aylıq gəlir uzunömürlülüyə təsir edir

Yeniyetməlik dövründə yaxşı fiziki formada olmaq sağlamlıq və uzunömürlülük üçün faydalı hesab olunur. Lakin "European Journal of Preventive Cardiology" jurnalında dərc olunan yeni bir araşdırma bu əlaqənin düşündüyümüz qədər sadə olmadığını göstərir.

TodayPress TV xəbər verir ki, aparılan araşdırmada isveçli alimlər 18 yaşında tibbi müayinədən keçmiş 1 milyondan çox şəxsin məlumatlarını təhlil ediblər. Daha dözümlü və fiziki cəhətdən aktiv olan şəxslərin həm xəstəliklərdən, həm də qəzalardan ölüm riski daha aşağı olub. Lakin bu nəticələr bəzi suallar doğurub: fiziki məşqlər, məsələn, boğulmadan necə qoruyur?

Tədqiqatçılar bu sualı cavablandırmaq üçün yalnız fərqli şəxsləri deyil, bir-birinə genetik və sosial baxımdan bənzər olan qardaşları da müqayisə ediblər. Nəticədə məlum olub ki, təhsil səviyyəsi, ailə gəliri və gündəlik vərdişlər də uzunömürlülükdə az rol oynamır.

Araşdırmanın müəllifləri qeyd edirlər ki, fiziki aktivliyin faydası danılmazdır, lakin onun insan ömrünə təsiri daha əvvəl olduğundan artıq qiymətləndirilmiş ola bilər. Bu nəticələr, yalnız fiziki formanın artırılmasına yönəlmiş kütləvi proqramların yenidən nəzərdən keçirilməsinin vacibliyini gündəmə gətirir.

Töhfə Səməd