Partnyorla çox vaxt keçirmək istəyinin arxasında nə dayanır?
Psixoloqların fikrincə, insanın bütün vaxtını partnyoru ilə keçirmək istəyi hər zaman güclü sevginin göstəricisi olmaya bilər. Bəzi hallarda bu istək daxili boşluğu, tənhalıq hissini və emosional çatışmazlıqları münasibət vasitəsilə aradan qaldırmaq cəhdi ilə bağlı olur.
TodayPress TV xəbər verir ki, xüsusilə insanın öz sosial çevrəsi, şəxsi maraqları və müstəqil emosional dəstək sistemi zəif olduqda, partnyordan bütün ehtiyaclarını qarşılaması gözlənilə bilər.
Belə vəziyyətdə münasibət bərabərhüquqlu tərəfdaşlıqdan çox, təhlükəsizlik və qayğı axtarışına çevrilə bilər. Bu hal narahat bağlılıq tərzinə malik insanlarda daha qabarıq müşahidə oluna bilər. İnsan partnyorundan daim diqqət, təsdiq və yaxınlıq gözləyir, tənhalıq hissini azaltmaq üçün münasibətə həddindən artıq bağlanır.
Mütəxəssislər belə münasibətləri bəzən “çatışmazlıq sevgisi” anlayışı ilə izah edirlər. Bu halda insan qarşısındakı şəxsi yalnız həyat yoldaşı və ya sevgili kimi deyil, həm də bütün problemlərini həll edəcək, onu qoruyacaq və emosional boşluğunu dolduracaq biri kimi görə bilər.
Eyni zamanda, “ideal cütlük” obrazına olan marağın arxasında yalnız romantik hisslər deyil, təhlükəsizlik ehtiyacı və cəmiyyətin formalaşdırdığı mükəmməl münasibət təsəvvürü də dayana bilər.
Mütəxəssislər sağlam münasibətin əsas şərtlərindən birinin tərəflərin həm birlikdə, həm də ayrı-ayrılıqda öz həyatlarının, maraqlarının və dəstək çevrələrinin olması olduğunu vurğulayırlar.
Türkan İsgəndərli
