Özünü xəstəliyə vuran kişi bir ildən çox Berlindəki hoteldə pulsuz qaldı
Almaniyanın paytaxtı Berlində bir ildən çox müddət ərzində hoteldə ödəniş etmədən yaşayan 55 yaşlı kişi dələduzluqda ittiham olunur.
TodayPress TV xəbər verir ki, bu barədə "Tagesspiegel" qəzeti məlumat yayıb.
Yerli prokurorluqdan bildirilib ki, həmin şəxs 2023-cü ilin aprelində həyat yoldaşı və iki uşağı üçün otaq sifariş edib. O, yaşayış qoşqusunun (treylerinin) yandığını, özünün isə xərçəng xəstəliyindən əziyyət çəkdiyini iddia edib. Lakin sonradan bu iddiaların yalan olduğu üzə çıxıb.
Dələduz, həmçinin hoteldəki xərcləri avtomobil klublarından birinin ödəyəcəyini desə də, bunun da həqiqəti əks etdirmədiyi məlum olub. Nəticədə, hoteldə qaldığı müddətdə onun 100 min avrodan çox borcu yaranıb. O, 2024-cü ilin avqustunda hesabı ödəmədən hoteli tərk edib.
Cari ilin mart ayında barəsində həbs qətimkan tədbiri seçilən şəxs bir müddət saxlanılsa da, sonradan sərbəst buraxılıb. Hazırda faktla bağlı istintaq araşdırmaları davam edir. Təqsirləndirilən şəxsi hansı cəzanın gözlədiyi hələlik məlum deyil.
