Azərbaycan iqtisadiyyatı xəstələnib - O məmura görə sıfır...

İqtisadçı Asif İbrahimov sosial şəbəkə hesabında 2026-cı illə bağlı proqnozunu yenidən xatırladıb.

TodayPress TV xəbər verir ki, iqtisadçı 2026-cı ilin ixtisarlar və resessiya ili olacağını dediyini bildirib.

“Neçə illərdir iqtisadi-sosial proseslərlə bağlı fikirlərimi və proqnozlarımı bölüşürəm. Bu yanaşma nə kiməsə qarşı düşmənçilikdən, nə də tənqid etmək xatirinədir. Mövcud iqtisadi mənzərəyə, idarəetmədəki dərin böhranlara və real vəziyyətə əsaslanır”, – deyə o qeyd edib.

Asif İbrahimov yazıb ki, bir çoxları onun paylaşımlarını bəyənməkdən belə çəkinir.

O bildirib ki, 10 ildən çoxdur bütün dövlət qurumlarında KPI-nin, yəni fəaliyyətin səmərəliliyini ölçən əsas göstəricilərin tətbiq edilməsinin vacibliyini vurğulayır:

“Hər bir rəhbərin qarşısında ölçülə bilən hədəflər olmalı, nəticə yoxdursa, məsuliyyət mexanizmi işə düşməlidir.

Bu gün isə cəmiyyət haqlı suallar verir. İqtisadi artım zəifləyir, bəzi sahələrdə problemlər dərinləşir, amma çox zaman nəticəyə görə məsuliyyət məsələsi gündəmə gəlmir.

Məsələn, dövlət müəssisələrinin fəaliyyəti, büdcə vəsaitlərinin səmərəli istifadəsi, xidmət keyfiyyəti ilə bağlı ciddi müzakirələr var. Əgər hər hansı qurum uzun müddət səmərəsiz işləyirsə, bunun səbəbləri araşdırılmalı və idarəetmə qərarları verilməlidir”.

İqtisadçı qeyd edib ki, kənd təsərrüfatında da illərdir inkişafdan danışılır, lakin bazarda qiymətlər, istehsal imkanları və yerli məhsulun əlçatanlığı ilə bağlı problemlər qalmaqdadır.

“Yay mövsümündə belə bəzi yerli meyvələrin yüksək qiymətə satılması sual yaradır. Aqrar ölkədə yay mövsümündə gilasın qiyməti niyə 8-12 manat olmalıdır? Dövlət büdcəsinə 3 milyard manat zərər vuran Bakı Metropoliteninin rəhbərliyinin səlahiyyətləri niyə artırılmalıdır? 0 faiz iqtisadi artıma görə kim cavab verməlidir?” – deyə, o, sual edib.

Asif İbrahimov başqa bir proqnoz da verərək bildirib ki, idarəetmə modeli və məsuliyyət mexanizmi dəyişməsə, mövcud problemlər daha da yığılacaq:

“Bunun sonu heç də yaxşı görünmür. İqtisadiyyat rəqəmləri uzun müddət “gözləmə rejimində” saxlamaqla idarə olunmur. Nəticə tələb edən və ölçülə bilən idarəetmə sistemi qurulmalıdır.

Artıq “Mən bunu demişdim” demək istəmirəm…”

Xanım Musayeva