“İstehlakçı siyasəti” standartlaşdırma üzrə Texniki Komitə yaradıldı
Texniki Komitənin fəaliyyəti istehlakçıların seçim imkanlarını yaxşılaşdırmağa, bu sahədə standartların hazırlanması prosesində bütün maraqlı tərəflərin fəal iştirakını təmin etməyə, məhsul və xidmətlərin keyfiyyət və təhlükəsizliyi barədə məlumat əlçatanlığını artırmağa töhfə verəcək.
TodayPress TV xəbər verir ki, Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin təşəbbüsü ilə Agentliyin tabeliyində fəaliyyət göstərən Azərbaycan Standartlaşdırma İnstitutu (AZSTAND) tərəfindən “İstehlakçı siyasəti” standartlaşdırma üzrə yeni Texniki Komitə (AZSTAND/TK 53) təsis edilib.
Texniki Komitənin yaradılmasında əsas məqsəd istehlakçılara mal və xidmət seçimində əlverişli şərait yaratmaq, bu sahədə beynəlxalq və dövlət standartlarının hazırlanması prosesində maraqlı tərəflərin fəal iştirakını təmin etmək, istehlakçıların gözləntilərini və bazarın tələblərini nəzərə almaq, mal və xidmətlərin keyfiyyəti və təhlükəsizliyi haqqında dəqiq informasiya əldə olunmasını təmin etməkdir.
Texniki Komitədə istehlakçıların hüquqlarının müdafiəsi sahəsində bilavasitə fəaliyyət göstərən 8 dövlət qurumu, eləcə də ictimai iştirakçılığın təmin edilməsi məqsədilə 5 ictimai birlik təmsil olunur.
Sözügedən Komitənin ilk iclasında Agentliklə yanaşı, Azərbaycan Standartlaşdırma İnstitutu (AZSTAND), Azərbaycan Respublikasının Mərkəzi Bankı, Azərbaycan Respublikasının İqtisadiyyat Nazirliyi, Azərbaycan Respublikasının Səhiyyə Nazirliyi, Azərbaycan Respublikasının Energetika Nazirliyi, Azərbaycan Respublikasının Rəqəmsal İnkişaf və Nəqliyyat Nazirliyi, Azərbaycan Respublikasının Qida Təhlükəsizliyi Agentliyi, Azərbaycan Respublikasının Dövlət Turizm Agentliyi, Azərbaycan Dövlət Su Ehtiyatları Agentliyi, “Azad İstehlakçılar” İctimai Birliyi, “Ticarət Şəbəkələrinin İnkişafı” İctimai Birliyi, Azərbaycan Keyfiyyət Assosiasiyası, Azərbaycan Pərakəndə Geyim İdxalçıları Assosiasiyası və Azərbaycan İnşaat Materialları İstehsalçıları Assosiasiyasının nümayəndələri iştirak ediblər.
Texniki Komitəyə sədrlik edən Agentliyin İstehlak bazarına nəzarət şöbəsinin müdiri Yusif Tapdıqlı iclasda Texniki Komitənin 2025-ci il üzrə fəaliyyət planına uyğun olaraq işlənib hazırlanmış AZS ISO/IEC GUIDE 14:2025 — “Məhsullar və əlaqəli xidmətlər — İstehlakçılar üçün məlumatlar”, AZS ISO/IEC GUIDE 76:2025 — “Xidmət standartlarının işlənib hazırlanması — İstehlakçı problemlərinin nəzərə alınması üzrə tövsiyələr” və AZS ISO/IEC GUIDE 41:2025 — “Qablaşdırma — İstehlakçı ehtiyaclarının nəzərə alınması üzrə tövsiyələr” standart layihələrinin mahiyyəti barədə danışıb, onların milli səviyyədə tətbiqinin istehlakçılara dəqiq məlumatların təqdim edilməsinə, xidmət keyfiyyətinin artırılmasına, eləcə də məhsulların qablaşdırılması zamanı təhlükəsizliyin gücləndirilməsinə və ümumilikdə ölkədə istehlakçı hüquqlarının müdafiəsinin beynəlxalq tələblərə uyğun təkmilləşdirilməsinə verəcəyi töhfələri diqqətə çatdırıb.
İclas çərçivəsində Texniki Komitənin fəaliyyət planı üzrə nəzərdə tutulan standart layihələri, bu sahədə mövcud olan beynəlxalq standartlar əsasında qabaqcıl dövlət standartlarının işlənib hazırlanması istiqamətində müzakirələr aparılıb.
Sonda Texniki Komitə üzvlərinin layihələrlə bağlı təklifləri dinlənilib, müzakirəyə çıxarılmış üç standart layihəsinə dair qeyd olunan rəylər nəzərə alınmaqla təkmilləşdirilməsi və təsdiq üçün təqdim olunması qərara alınıb.
PHOTOS
