Cənubi Koreya smartfonlarının Rusiyaya idxalı maksimumuna çatdı

Cənubi Koreyanın Statistika Xidmətinin məlumatına görə, 2025-ci ilin may ayında Rusiyanın Cənubi Koreyadan idxal etdiyi smartfonların həcmi son altı ayın ən yüksək göstəricisi olub.

TodayPress TV xəbər verir ki, Rusiya may ayında Cənubi Koreyadan ümumi dəyəri 68 min dollar olan smartfonlar alıb.

Bu, 2024-cü ilin dekabrından bəri ən yüksək göstəricidir. Aylıq müqayisədə artım 15,3%, illik müqayisədə isə təxminən 8% təşkil edib.

2025-ci ilin yanvar-may ayları ərzində Rusiya Cənubi Koreyadan 200 min dollar dəyərində smartfon idxal edib. Bu, ötən ilin eyni dövrü ilə müqayisədə 13% artım deməkdir. 2024-cü il ərzində ümumi idxal həcmi 814 min dollar təşkil etmişdi.

May ayında Cənubi Koreya istehsalı olan smartfonların əsas alıcıları ABŞ (230,4 milyon dollar), Kanada (46,4 milyon) və Böyük Britaniya (31,9 milyon) olub. Avstriya və Almaniya müvafiq olaraq 28,9 və 24,9 milyon dollar dəyərində cihaz idxal edib. Rusiya bu siyahıda 33-cü yeri tutur.

Xatırladaq ki, 2025-ci ilin martında Rusiyaya Cənubi Koreya smartfonlarının tədarükü dörd dəfə azalmış və 17 min dollara enmişdi. Bu, son illərin ən aşağı göstəricilərindən biri olmuşdu.

Qiymət Mahir