«Santos» Neymarla yoluna davam edir
Braziliyanın “Santos” klubunun ulduz hücumçusu Neymarın gələcəyi ilə bağlı yeni detallar məlum olub.
TodayPress TV xəbər verir ki, bu barədə tanınmış jurnalist və insayder Fabrizio Romano “X” sosial şəbəkəsində məlumat yayıb.
Mənbənin məlumatına görə, 33 yaşlı vinger “Santos”la yeni müqavilə şərtlərini razılaşdırıb və ən azı 2026-cı ilin dekabr ayına qədər klubun formasını geyinməyə davam edəcək.
Qeyd edək ki, Neymarın “Santos”la əvvəlki müqaviləsinin müddəti 31 dekabr 2025-ci ildə başa çatıb. Cari mövsümdə braziliyalı futbolçu ölkə çempionatında 20 oyuna çıxaraq 8 qol vurub və 2 məhsuldar ötürmə ilə yadda qalıb.
“Transfermarkt” portalında Neymarın hazırkı transfer dəyəri 10 milyon avro qiymətləndirilir.
Namiq HUN
