Ferstappendən Macarıstan Qran-prisi ilə bağlı diqqətçəkən açıqlama
“Red Bull” pilotu və “Formula-1” üzrə dördqat dünya çempionu Maks Ferstappen Macarıstan Qran-prisində qazandığı ikinci yeri şərh edib.
TodayPress TV xəbər verir ki, niderlandlı pilot yarışdan sonra bolidində zədə aşkar etdiyini bildirib.
Ferstappenin sözlərinə görə, yarış ərzində bolid sıralama turundakı kimi idarəetmə problemləri yaşayırdı.
“Yarışda da sıralama turunda olduğu kimi eyni problemlər var idi. Bolid həddindən artıq dönürdü və müəyyən mərhələdə təkərlərin aşınması da çox sürətli oldu. Startdakı irəliləyiş isə ilk hissəni uğurla keçməyimizə kömək etdi”, – deyə pilot bildirib.
Maks qeyd edib ki, pit-stop strategiyası səbəbindən mövqeyini itirsə də, daha sonra Lyuis Həmiltonu geridə qoyaraq yarışın ikinci hissəsini rahat keçirə bilib.
“Yumşaq təkərlərlə finişə qədər çatmağın çətin olacağını düşündüm, amma bacardıq. Hələ də ikinci yeri necə tutduğumuzu başa düşmürəm. Düşünürəm ki, komanda olaraq gözləntilərdən daha yaxşı çıxış etdik”, – deyə Ferstappen vurğulayıb.
Pilot əlavə edib ki, finişdən sonra boliddən düşərkən maşında zədələr olduğunu görüb.
“Boliddən düşəndə onun hansı səbəbdənsə zədələndiyini gördüm. Bu yarışda işimiz heç də asan olmadı”, – deyə “Formula-1” ulduzu fikrini tamamlayıb.
Namiq HUN
