Coş Riçardson basketbolla vidalaşdı: “Hər şeyimi verdim”

NBA veteranı 10 mövsümdən sonra peşəkar basketbolçu karyerasını başa vurub.

TodayPress TV xəbər verir ki, NBA-da uzun illər çıxış etmiş təcrübəli amerikalı müdafiəçi sosial şəbəkə hesabında paylaşdığı vida mesajında basketbola hər zaman bütün gücü ilə xidmət etdiyini və karyerasını peşmanlıq hissi olmadan başa vurduğunu bildirib.

“Mən hər zaman bu oyuna hər şeyimi vermişəm və buna görə də heç bir peşmanlığım yoxdur. Basketbolu sevmək və onun da mənə eyni sevgini qaytarması üçün fürsət qazandığıma görə minnətdaram. Məktəbdə, universitetdə və NBA-da hər uğuru zəhmətimlə əldə etmişəm. Bütün azarkeşlərə, məşqçilərə və komanda yoldaşlarıma təşəkkür edirəm”, – deyə Riçardson yazıb.

Qeyd edək ki, Coş Riçardson 2015-ci il NBA draftının ikinci raundunda “Mayami Hit” tərəfindən 40-cı sıradan seçilib. O, 10 mövsüm ərzində müntəzəm çempionatda 554 oyuna çıxıb və orta hesabla 11,5 xal, 3,0 ribaund və 2,6 məhsuldar ötürmə ilə yadda qalıb. 

Riçardson NBA karyerası ərzində yalnız klub müqavilələrindən 62,3 milyon ABŞ dolları gəlir əldə edib. O, müxtəlif illərdə “Mayami”, “Filadelfiya”, “Dallas”, “Boston”, “San Antonio” və “Nyu-Orlean” klublarının formasını geyinib.

Namiq HUN