Samuxda "qara yara" həyəcandı: Kəndə xüsusi nəzarət postu qoyuldu

Samux rayonunun Alıuşağı kəndində xüsusi nəzarət postu quraşdırılıb.

TodayPress TV "Teleqraf"a istinadla xəbər verir ki, kənddə avtomobillərin hərəkəti tam şəkildə açıqdır.

Postda əsasən ərazidən ət və süd məhsullarının çıxarılmasına və daşınmasına nəzarət olunur.

Qida Təhlükəsizliyi Agentliyinin (AQTA) və yerli Baytarlıq İdarəsinin mütəxəssislərinin cəlb olunduğu postda yolla hərəkət edən avtomobillər dezinfeksiya edilir. Bundan əlavə, kənddəki iri təsərrüfatlarda dezinfeksiya baryerləri (dеzbaryerlər) yaradılıb.

Qeyd edək ki, avqustun 13-də Abbas Səhət adına Gəncə Birləşmiş Xəstəxanasının Yoluxucu xəstəliklər şöbəsinə "qara yara" infeksiyası əlamətləri ilə 11 nəfər yerləşdirilib. Bu şəxslərin böyük əksəriyyəti Samux rayonunun Alıuşağı kənd sakinləridir.

TodayPress TV