Seutada miqrant böhranında Mərakeş hökümətinin əli var? - İspaniya araşdırır

İspaniya hökuməti Seuta şəhərində yaranmış miqrant böhranında Mərakeş hakimiyyətinin mümkün rolunu araşdırır.

TodayPress TV "TASS"a istinadən xəbər verir ki, bu barədə Avropa Komissiyasının Daxili İşlər və Miqrasiya üzrə komissarı Maqnus Brunner Aİ-yə üzv ölkələrin daxili işlər nazirlərinin Seutadakı vəziyyətlə bağlı keçirilən təcili onlayn iclasından sonra təşkil olunan mətbuat konfransında məlumat verib.

Brunner jurnalistlərin Mərakeş hakimiyyətinin böhranın təşkilində iştirak edib-etmədiyi barədə sualını cavablandırarkən bildirib ki, hazırda İspaniya bu istiqamətdə araşdırma aparır.

"İspaniya araşdırma aparır. Nəticələri gözləməliyik. İstintaq başa çatana qədər bu barədə hər hansı fikir bildirmək düzgün olmaz", – deyə o vurğulayıb.

Bu suallar Mərakeşdən yayılan və sosial şəbəkələrdə paylaşılan videogörüntülərdən sonra gündəmə gəlib. Həmin kadrlarda miqrantları daşıyan yük maşınlarının Seuta sərhədinə doğru hərəkət etdiyi, sərhədə yaxın ərazilərdə isə polis tərəfindən dayandırıldığı görünür.

Avropa Komissiyasının məlumatına görə, böhranın yaranmasında cinayətkar insan qaçaqmalçılığı şəbəkələrinin də rolu olub. Bildirilir ki, həmin qruplar ərəbdilli sosial media platformalarında məqsədli şəkildə dezinformasiya və yanlış çağırışlar yayaraq minlərlə miqrantın Seutaya yönəlməsinə şərait yaradıblar.

Jalə Rövşən