Erməni kilsəsi tarixində ilk: Katolikos II Qaregin məhkəmə qarşısına çıxacaq
Ermənistanın və erməni kilsəsinin tarixində ilk dəfə bütün ermənilərin katolikosu məhkəmə qarşısına çıxacaq.
TodayPress TV xəbər verir ki, məlumata görə, katolikos II Qaregin və Ali Ruhani Şuranın altı üzvü ilə bağlı cinayət işi üzrə ilkin məhkəmə dinləməsi avqustun 7-də Ermənistanın Armavir vilayətinin ümumi yurisdiksiyalı birinci instansiya məhkəməsində keçiriləcək.
Ermənistan Baş Prokurorluğu cari ilin fevral ayında II Qaregin barəsində cinayət işi açıb və onun ölkədən çıxışına qadağa qoyulub.
Cinayət işi sabiq din xadimi Arman Saroyanın məhkəmə qərarı ilə vəzifəsinə bərpasına mane olmaq ittihamı əsasında başlanıb. Bildirilir ki, Saroyan katolikosun qərarı ilə yeparxiya rəhbəri vəzifəsindən uzaqlaşdırılıb, daha sonra Ali Ruhani Şuranın qərarı ilə yepiskop rütbəsindən məhrum edilib.
Vəkil Ara Zöhrabyan bildirib ki, dövlətin kilsə rəhbərliyinin qərarlarına müdaxiləsi kilsənin muxtariyyətinə və dini azadlıq prinsiplərinə ziddir.
Ermənistan müxalifətinin bəzi nümayəndələri isə katolikos və yepiskoplara dəstək məqsədilə parlament iclasında iştirak etməyəcəklərini və məhkəmə prosesinə qatılacaqlarını açıqlayıblar.
