"Günün ortasında yolu kəsib, qazıb, asfalt çəkəndə belə olacaq" - Gənclikdə baş verən dəhşətli qəzanın günahkarları kimdir?
Mayın 14-də paytaxtın Nərimanov rayonunda ağır yol-nəqliyyat hadisəsi baş verib. Qəza nəticəsində bir neçə nəfər xəsarət alıb. Sosial şəbəkələrdə yayılan görüntülərdə bəzi sürücülər hadisənin baş verməsinə yolda aparılan xətlənmə işlərinin səbəb olduğunu iddia ediblər.
İddialara görə, aidiyyəti qurum tərəfindən günorta saatlarında həyata keçirilən yol nişanlama işləri sürücülər üçün çətinlik yaradıb və nəticədə qəza baş verib.
TodayPress TV xəbər verir ki, Xəzər-Lənkəran FK klubunun keçmiş vitse-prezidenti Rəvan Bəşirov paytaxtın Gənclik ərazisində baş verən ağır yol qəzasına münasibət bildirib.
O bildirib ki, gündüz saatlarında aparılan təmir və quraşdırma işləri şəhərdə ciddi nəqliyyat sıxlığı yaradır və sürücülər üçün təhlükəli vəziyyət formalaşdırır:
"Gənclikdə tuneldə çox ağır qəza baş verib. Səbəbi də günün günorta çağı görülən işlərdir. Biri xətt çəkir, biri svetofor quraşdırır, biri elektrik xətlərini dəyişir, biri rabitə naqillərini və s. Bu işləri insanlara əzab vermək üçün edirsiniz, yoxsa işini rahatlaşdırmaq üçün?".
Keçmiş klub rəsmisi qeyd edib ki, bir müddət əvvəl eyni ərazidə aparılan işlər səbəbindən sürücülər saatlarla yolda qalmalı olub:
"O dəfə də ən azı 500 avtomobil 500 metr getmək üçün 5 saat süründük. Gəlib çatanda gördük ki, yolu kran və yük maşını bağlayıb, svetofor quraşdırır. Niyə bu qurumlar bütün təmir, bərpa və s. kimi işlərini gecə eləmir? Bütün hər şeyi iflic etmək və ya belə qəzalara səbəb olmaq kimin xoşuna gəlir?".
Türkan İsgəndərli
