Çətin zamanların strateji tərəfdaşları: Bakı və Budapeşt - ŞƏRH

“Azərbaycan Prezidenti İlham Əliyevin Macarıstana işgüzar səfəri Bakı və Budapeşt arasında münasibətlərin yeni mərhələsi hesab olunmalıdır”. 

Milli Məclisin deputatı Bəhruz Məhərrəmov bunu TodayPress TV-yə danışarkən deyib. 

O diqqətə çatdırıb ki, iki ölkə arasında əlaqələr yüksələn xətt üzrə inkişaf edir. Ötən dövr ərzində prezidentlər səviyyəsində 8, hökumət başçıları səviyyəsində 7, parlament sədrləri səviyyəsində 5, xarici işlər nazirləri səviyyəsində isə 19 olmaqla, ümumilikdə 39 qarşılıqlı səfər həyata keçirilib. Habelə bir sıra beynəlxalq platformalarda ölkələr istisnasız olaraq bir-birinin maraq və mənafelərinin ifadə olunduğu mövqeyi dəstəkləyib.   

“Prezident İlham Əliyevin də ifadə etdiyi kimi, aramızda olan təmaslar müntəzəm xarakter daşıyır və Azərbaycan-Macarıstan əlaqələri hazırda da böyük uğurla inkişaf edir. Təbii ki, ortaq tarixi köklər dövlət başçılarının mətbuata birgə bəyanatlarında da ifadə etdikləri kimi, bir sıra oxşarlıqlar münasibətlərin perspektivinə önəmli təsir göstərməkdədir. Lakin heç şübhəsiz ki, Bakı və Budapeşti yaxınlaşdıran əsas amil liderlərin etibarlı tərəfdaşlıq mühitini qura bilməsidir. Macarıstanın Baş naziri Viktor Orbanın ifadə etdiyi kimi, ötən dövr ərzində bu ölkənin diplomatiyada, neft-qaz sənayesində və digər sahələrdə qarşılaşdığı istənilən çətinlik zamanı ölkə başçımız Macarıstanın yanında olub və bu gün Budapeştdə Azərbaycana güvənilir, strateji tərəfdaş, Prezident İlham Əliyevə isə macarların ən çətin günlərinin güvənc yeri kimi baxılır”. 

Millət vəkilinin sözlərinə görə, sevindirici haldır ki, qlobal gərginliklərin artdığı və ziddiyyətlərin dərinləşdiyi bir məqamda Azərbaycan və Macarıstan münasibətləri yüksələn xətt üzrə inkişaf tempini qoruya bilib: 

"Ölkə başçımızın işgüzar səfəri Macarıstanda Türk Dövlətləri Təşkilatının (TDT) dövlət başçılarının qeyri-rəsmi iclası çərçivəsində baş tutub. Macarıstanın müşahidəçi statusuna baxmayaraq, Zirvəyə ev sahibliyi etməsi heç şübhəsiz ki, bu təşkilatın fəaliyyət miqyasının və potensialının güclənmə perspektivlərindən qaynaqlanır. Sirr deyil ki, qeyd olunan situasiya Azərbaycanın maraqları ilə tam üst-üstə düşür. Belə ki, möhtərəm Prezident ötən ilin fevral ayının 14-də andiçmə mərasimində xarici siyasət kursumuzun əsas istiqaməti kimi Türk dünyası ilə əməkdaşlığı göstərmişdi”. 

Bəhruz Məhərrəmov vurğulayıb ki, Budapeştdə TDT-nin dövlət başçılarının qeyri-rəsmi iclasında Prezident İlham Əliyevin Azərbaycanın bu təşkilatın üzvləri ilə əlaqələrə verdiyi önəmi iqtisadi, ticari və investisiya statistikasında açıqlaması, o cümlədən Macarıstanın Baş naziri Viktor Orbanla bərabər mətbuata birgə bəyanatında çox korrekt və açıq şəkildə mövqe ifadə etməsi bu reallığı bir daha üzə çıxartdı.

Qeyd edək ki, Azərbaycan Respublikasının Prezidenti İlham Əliyev Macarıstanın Baş naziri Viktor Orbanın dəvəti ilə mayın 20-də Macarıstana işgüzar səfərə gəlib. Səfər mayın 21-də başa çatıb.

Səfər çərçivəsində ölkə başçısı bir sıra mühüm görüşlər keçirib, TDT dövlət başçılarının qeyri-rəsmi iclasında çıxış edib. 

Töhfə Səməd