Bitki mənşəli qidalar qadın sağlamlığı üçün vacib rol oynayır

Qadın orqanizmi xüsusi qidalanma yanaşması tələb edir.

TodayPress TV xəbər verir ki, qadınlar üçün gündəlik menyuda mütləq şəkildə paxlalı bitkilərə – lobya, mərcimək, noxud və soya məhsullarına yer verilməlidir.

Bu qidalar bitki zülalı, dəmir və fol turşusu ilə zəngindir. Bu maddələr hüceyrələrin yenilənməsi, qan azlığının qarşısının alınması və reproduktiv sağlamlığın qorunması baxımından xüsusilə vacibdir. Hamiləlik və menstruasiya dövründə bu məhsulların istifadəsi daha da önəm daşıyır.

Qidalanmada göyərti – keşniş, cəfəri, şüyüd və ispanaq da əhəmiyyətli yer tutur. Bu göyərtilər kalsium, maqnezium və "K" vitamini ilə zəngindir ki, bu da sümüklərin möhkəmlənməsinə kömək edir. Eyni zamanda antioksidantlarla zəngin olan bu məhsullar dərinin qocalmasını ləngidir və ətraf mühitin mənfi təsirindən qoruyur.

Qadınlar üçün başqa bir faydalı komponent isə çia və kətan toxumlarıdır. Bu toxumlar "omeqa-3" yağ turşularının bitki mənşəli mənbəyidir və ürək-damar sisteminin sağlamlığını dəstəkləyir, iltihab əleyhinə təsir göstərir.

Qarağat, moruq, böyürtkən və zoğal kimi giləmeyvələr güclü antioksidant təsirə malikdir və sidik-cinsiyyət sisteminin fəaliyyətini yaxşılaşdırır. Bundan əlavə, badam, qoz, balqabaq və günəbaxan toxumları da menyuda yer almalıdır. Bu məhsulların tərkibində olan "E" vitamini, sink və selen saç, dırnaq sağlamlığı və hormonal tarazlıq üçün əhəmiyyətlidir.

Bitki mənşəli və balanslı bir pəhriz yalnız ümumi vəziyyəti yaxşılaşdırmır, həm də qadınlarda bir çox xəstəliklərin riskini azalda bilər.

Töhfə Səməd