İordaniyadakı ABŞ aviabazasında dəhşətli saatlar: İran raketləri yaşayış blokuna düşdü
İki amerikalı hərbi qulluqçunun həlak olması ilə nəticələnən İranın İordaniyadakı aviabazaya endirdiyi raket zərbəsi idman zalına, təyyarə anqarına və əsgərlərin yatdığı yaşayış blokuna düşüb.
TodayPress TV xəbər verir ki, bu barədə "The Wall Street Journal" amerikalı rəsmilərə istinadən məlumat yayıb.
Nəşrin məlumatına görə, birinci raket bazanın trenajor zalını vurub. Hərbi qulluqçuların bunkerlərdə gizlənməsinə imkan verən sirenin vaxtında işə düşməsinə baxmayaraq, bir neçə nəfər yaralanıb.
Bir neçə saat sonra ikinci raket boş təyyarə anqarına düşüb. Üçüncü zərbə yaşayış blokuna dəyib. Xəbərdarlıq sistemi yenidən işə düşsə də, hərbi qulluqçuların hamısı sığınacaqlara çata bilməyib.
Pentaqon Havaydan olan leytenantın və Texasdan olan sıravinin həlak olduğunu təsdiqləyib. Daha bir hərbi qulluqçu itkin düşmüş hesab olunur. WSJ-nin məlumatına görə, hərbi qulluqçuların binanın daxilində, yoxsa sığınacağa gedən yolda həlak olduğu hələlik aydın deyil.
Qəzetin bildirdiyinə görə, üç raketin hava hücumundan müdafiə vasitələrindən keçə bilməsi faktı regionda yerləşdirilmiş təxminən 50 min hərbi qulluqçunun müdafiəsi ilə bağlı problemlərdən xəbər verə bilər.
Daha əvvəl ABŞ Silahlı Qüvvələrinin Mərkəzi Komandanlığı (CENTCOM) hərbi qulluqçuların iyulun 17-də İranın hava hücumunu dəf edərkən həlak olduğunu bildirmişdi.
