Kilsə-Paşinyan münaqişəsi: Seçkiyə qədər siyasi aydınlaşma gözlənilir
"Ermənistanda iqtidarla kilsə arasında münasibətlərin gərginləşməsi təkcə 2026-cı ildə keçiriləcək seçkilərlə bağlı deyil, həm də onların ideoloji baxışları və ölkənin gələcəyi ilə bağlı fərqli mövqelərindən qaynaqlanır".
Politoloq Mütəllim Rəhimli bu sözləri TodayPress TV-yə açıqlaması zamanı bildirib.
O hesab edir ki, Ermənistanın Baş naziri Nikol Paşinyanın Qərbyönümlü siyasəti, Rusiyadan getdikcə uzaqlaşması, erməniləri xəyalpərəstlikdən reallığa dəvət etməsi, real Ermənistan düşüncəsindən və başqalarının forpostu olmaqdan imtina niyyəti kilsənin narazılığı ilə qarşılanır. Onlar düşünürlər ki, əgər tezliklə Paşinyanı hakimiyyətdən devirməsələr, Ermənistanın siyasi səhnəsindən birdəfəlik yox olacaqlar. Buna görə də qarşıdan gələn seçkiləri “ölüm-qalım” mərhələsi kimi dəyərləndirirlər.
"Paşinyan üçün bu mərhələ kifayət qədər həlledici xarakter daşıyır. Əgər o, seçkilərdə məğlub olarsa, komandası ilə birlikdə mühakimə olunacaq. Üstəlik, Ermənistanın müstəqillik dövründən bəri yaşadığı bütün uğursuzluqlar Paşinyan hakimiyyətinin üzərinə yüklənəcək",- deyə siyasi şərhçi açıqlayıb.
Onun fikrincə, hazırda elə bir vəziyyət yaranıb ki, tərəflərdən heç birinin geri çəkilmək imkanı yoxdur. Bu, onların həm siyasi, həm də ictimai həyatlarına baha başa gələ bilər. Məhz buna görə də Paşinyanın kilsəyə qarşı ardıcıl hücumlarını müşahidə etmək mümkündür. Həmçinin bu mübarizə ona ciddi çətinliklər yarada və ağır nəticələr doğura bilər. Bununla belə, hadisələrin gedişi göstərir ki, Paşinyanın bu qarşıdurmada qalib gəlmək şansı kifayət qədər yüksəkdir.
"Paşinyan seçkilərə qədər kilsə ilə arasında yaranmış münaqişəyə son qoymağa çalışır. Əks halda, qarşıdakı seçkilər onun üçün heç də asan keçməyəcək. O, həm seçki kampaniyasını aparmağa, həm də ölkə daxilində baş verə biləcək çoxsaylı təxribatların qarşısını almağa məcbur olacaq. Paşinyanın rəqibləri isə məqsədlərinə çatmaq üçün təxribatlar, sui-qəsdlər və partlayışlar kimi addımlardan çəkinməyəcəklər. Bu cür üsullar onların dünyagörüşünə və mübarizə metodlarına tam uyğun gəlir", - deyə analitik vurğulayıb.
M.Rəhimli əlavə edib ki, Paşinyan ilk növbədə Erməni Apostol Kilsəsinin katolikosu 2-ci Qaregini zərərsizləşdirməyə çalışacaq. Bunun ardınca, ona sadiq qüvvələrin siyasi proseslərə təsir imkanlarını minimuma endirmək niyyətindədir. Beləliklə, seçkilərə qədər Ermənistanın siyasi səhnəsində müəyyən aydınlaşmanın yaranacağı gözlənilir.
Qeyd edək ki, Ermənistanda seçkilər yaxınlaşdıqca hakimiyyət və kilsə arasındakı qarşıdurma artır.
Aysel Mətləb
FOTOLAR
